شلون حيدر ودعتهه الزهره الك روح ونظر
وادري من رديت دمعه انذبحت اباب الصبر
يعينك الله يا علي
بالمصايب مبتلي
****************************
يا علي ومن غسلتهه ارد اسألك عالضلع
من لمسته ابجف رحمتك هم نزف دم ودمع
وهم بجت حزن الليالي وطفت عيون الشمع
هم شفت بسمار يكتل بس كلبهه المنفجع
روعوهه المجرمين
ذبحوا انفاس الجنين
وحركوا الباب العليهه صلت املاك الطهر
***********************************
الحسن وحسين دمعه بجفن زينب تنتحب
ولوعة المظلوم لوعه اتكطع انياط الكلب
اومنه راحت اه يابويه ايتام صرنه بيا ذنب
وجرح حيدر سال مدمع من جمر عينه يصب
مو ضلعهه اللي انكسر
هذا حيدر النطبر
وهذا صدر الهادي ينزف صابه بسمار الغدر
**********************
الليل جناز الوديعه وبكلب حيدر نعش
ونة الاملاك تنحب هزت بونهه العرش
والدرب جرح اعله طوله بدمع زينب منفرش
تنادي يمه سهام جرحج تنهش بضلعي نهش
ريته ضلعي الانكسر
وريته لحدي اللي انحفر
ولا تشوف عيوني وجهج بين طيات الكبر
**************************
برمش عينك جفنتهه لو الكساء الهه جفن
يا علي ومن وسدتهه كلبك وياهه اندفن
وهم هلت التراب كلي اعليهه لو هذا الجفن
بوسط عينك ظل كبرهه وروحهه الروحك سكن
شلون نور الزهره غاب
وصار ما بين التراب
شمعه من نور النبوه انطفت ببحور الكدر
____________________________________
حسين زايد البديري