تويت
هذا صدى الرب العلي *** انْ لا فتى الا علي
جبريل نادى والشعار *** لا سيف الا ذو الفقار
*********
ابجي ودمع عيني انهار*** سالت على الوجنه احزان
صابوا علينه الكرار *** صايم يصلِّي برمضان
ساجد عَبِدْ للقهار *** يقره ويِرَتْل القرْان
ثارُ وتِطلْبه الكفّار *** جيفن هدم للاوثان
لنَّك هِجمت على الوثن *** يا سيدي يا بالحسن
ثاروا وَمِنْ اجلِ حِجار *** لا سيف الا ذو الفقار
**************************
يونس صرخ وانته جْواب *** اسمك فتح بطن الحوت
حبك ثبت بالاصلاب *** بامر السمه واللاهوت
كعبه المهد والمحراب ***ليلة قدر بيها تموت
حيدر علي راسه انصاب *** واصبح قلبنه التابوت
بالدم علي وانته النبض *** جفك يهز هذي الارض
علْم به الدنيا تُدار *** لا سيف الا ذو الفقار
**********************
حيدر خليفة ياسين *** غصْبنْ على هلْ حساد
سيفه نشر هذا الدين *** تشهد جثث والاجساد
ماتوا شرك ملعونين *** اهل الكفر والالحاد
شيعه لعلي وموالين *** مهما الظلم بيهم زاد
انته الاخو وانته النفس *** حيدر يمن رد الشمس
والليل قد اضحى نهار *** لا سيف الا ذو الفقار
**************************
شكتب بدر يا موضوع *** ماظن حواك الف كتاب
فوك النبي صرت دروع *** يوم باحد طه انصاب
خيبر بجت ليك دموع *** ويدك يحب بيها الباب
والعامري هالمكطوع *** بالنص يليث المحراب
شوصف خجلت من الوصف *** يرجف على اوراقي الحرف
رغم الردى تبقى منار *** لا سيف الا ذو الفقار
*****************************
لارض النجف كلنه نزور *** لنك علي تلاكي الضيف
من البعد شفنه النور *** ما هو حلم لا هو طيف
راسك غضب جنه يفور *** ويدك تسل بيها السيف
شفت النجف كلها كبور *** ماتوا ذبح وسفه وحيف
فجروا مواكب كربله *** ردوا يزيد وحرمله
قبحا لهم يكفي دمار *** لا سيف الا ذو الفقار
تعليق