تويت
عيدية لمجلس النوام والحكومه العرجاء
الملا عبدو الكرخي رحمه الله مليون مرة بل رحمه الله بعدد نفوس العراقين الآن ، كتب هذه القصيدة قبل سبعين عاما عن البرلمان والحكومة حين ذاك ، لكن المثير في هذه القصيدة الضاربة في الوجدان ، ان من يطالع سطورها الشعرية يوقن كما لوإنها كتبت الآن ، والقصيدة وصلت الى بريدي الإلكتروني صباح العيد من كائن وطني لا اعرفه حقا ، وجدت من المناسب ان اضعها امام عيون القراء في موقع كتابات عسى يشعروا ببعض الراحة بعد الإنتهاء من التمعن في سطورها الشعرية الواخزة بل الضاربة على الوتر الحساس للحكومة ولمجلس النواب .. وما أشبه البارحة باليوم ، وكل عام ونحن بعيد مازال بعيدا عن امنيات العراقيين ويا للأسف .
قيم الرگاع من هاي اللحه
اتشوفه هيبه وعنده لحيه امسرحه
يشتم ابلا خجل وبلا مستحه
من ايحس المقعد اشويه اندحچ
قيم الرگاع من ديرة عفچ
برلمان اهل المحابس والمدس
عگب ماچانوا يدورون الفلس
هسه هم يرتشي وهم يختلس
ولو نقص من راتبه سنت انعقچ
قيم الرگاع من ديرة عفچ
اتشوف واحدهم امعگل بالوقار
وبالاصل تاريخه اسود كله عار
ابضرف ثلث اسنين مليونير صار
ايريد عالوادم ايعبرله چلچ
قيم الرگاع من ديرة عفچ
گمت ما اعرف حماها امن الرجل
ياهو التكضه اهو ايمثل العدل
وگمنه نستورد الشلغم والفجل
لان كلها ضلت اتدور ودچ
قيم الرگاع من ديرة عفچ
والله ضيعنه الصدگ من الچذب
اتشوفه هيبه وحچيه المصفط عذب
ياخذك وايردك ابشرق وغرب
وبسچاچينه يدچك حيل دچ
قيم الرگاع من د يرة عفچ
حيل دوخني الحچي الماله ربط
وصار عندي سكر وحصبه وضغط
نفترش عاگول ونتغطه ابحسچ
قیم الرگاع من ديرة عفچ
گمت ما اميز الذيب امن الحمل
امنين ما التفت گلبي يشتعل
انه ما شايف شعب يتبع خبل
شاب راسي وتيهت كل السچچ
قيم الرگاع من ديرة عفچ
يا حكومتنه الرشيده ام الوقار
الفساد المالي عنوان الچ صار
ندري جابوكم ابدبابه وقطار
ليش ضليتوا سمچ ياكل سمچ
قيم الرگاع من ديرة عفچ
لازم انميز الزين امن الزلم
وننتخب كلمن شهم صاحب علم
ونرفض اللي يجي كل يوم ابفلم
من ايشوف المنصب اشويه اندرچ
قيم الرگاع من ديرة عفچ .
تعليق