تويت
مصابيح عنكبوتية للدعاية الانتخابية في النعمانية من قائمة المالكية؟؟؟!!!
آخر فضائح الدعايات الانتخابية هذه المرة جاءت من مرشح قائمة المالكي في النعمانية التابعة لمحافظة واسط وهو من السادة الحبوبية , ويبدو أن مولانا السيد لفت إنتباهه أن الوطنية هذه الأيام قوية بحيث يمكنه أن يوزع مصابيح كهربائية من العيار الثقيل أم (10000) دينارالاصلية , أو أنطة سيدنه 25 مصباح حصة المستشفه النعمانية وحدهه , مولانه هواي خايف على المرضى , هسه هو الرجال شرايد منهم بس الدعاء للسيد أو للمالكي؟؟؟!!!
الإخوان كالوله سيدنه شنهو هالزحمة مكلف نفسك , كالهم :عمي هو إحنه شمحصلين من دنيانه غير العمل الصالح؟؟؟!!!
ياهو المات وخذهه أوياه , واحد من الفضوليين , كال للسيد المرشح سيدنه شلونهه الحملة مالتك ؟؟؟!!!
السيد إنحرج شوية , أو كاله والله البركة بيكم أو بهاي الوجوه الفليحة؟؟؟!!!
السيد إمصيطر , كام على حيلة أو كال آني أريد أخدم الناس ؟؟؟!!!
واحد من معارف السيد , كاله سيدنه هسه لو منطينه كارت أبو العشرة مو أحسن؟؟؟!!!
السيد بلع ريكه , يابه إحنه خاف إتحسبوهه علينه رشوة , والنوب شيخلصنة ؟؟؟!!!
السيد ودع الجماعة بالمستشفه وأخذ له فره بالسوك يشوف شنهي النتائج ؟؟؟!!!
السيد كال الربعه شنهو القضية شو ولا واحد معلك الكلوبات الوزعناهه عليهم؟؟؟!!!
كالوله سيدنه العالم طاكهه الهبري , يمكن باعوهن بخمس تالاف عله أبو الثريات؟؟؟!!!
والله يا إخواني ما أدري شكول عله هاي السالفة مالت السيد الحبوبي الرجال صرفله بالمليون , خطيه ما يدري الجماعه وراه راح يبيعون الكلوبات , رزق أو جاي للحلك؟؟؟!!!
والله عيب هذوله فضحونه بين الدول , ساعه كارتات , ساعه كلوبات , ساعه أجلكم الله حفاظات؟؟؟!!!
عمي يزي عاد خلولهه حد , شو الشته جاينه , أوزع بطانيات , لو البطانيات صارت سالفتهه سالفه , أو كامو يسموهم جماعة البطانية؟؟؟!!!
لازم الجماعة يغيرون برنامجهم الانتخابي مرة بطانية أو يوم كارتات أو يوم كلوبات أو باجر حفاظات أو عكبه تشيرتات, حته المواطن ما يمل, شيريد المواطن بعد منهم هل مكاريد , ماظل عدهم شي ينطوه