تويت
العليله ع // ابو ايمان المجراوي
ما حسبت تنسوني . يا گومي من عفتوني
طفله وعلى أفراش الأجل . بين المصايب والعلل
يا گومي من عفتوني
***********
من ساعة رحلكم با لضعن طوّح
أبات أعله العلل وعله ألونين أصبح
صفه بروحي الألم بـأسم الحزن يمرح
وكل لحظه بذكركم دهري بي يجرح
وجروحي وسط الدلال . تا خذني من حال الحال
ما لومه لفراگ الأهل . بين المصايب والعلل . يا گومي من عفتوني
**************
عليلة وما رحم عگب الأهل دهري
غرس سهم الهجر بضلوعي من صغري
أفز من نومي اشوفن دمعتي تجري
على افراگ الأهل ساعدني يا صبري
رك البدن ما ضل حيل . من السهر طول الليل
حكم الدهر بيه اشعمل . بين المصايب والعلل . يا گومي من عفتوني
***************
يجيني الليل وسهر ويه حسباتي
وخلّصها بألم يا گومي ساعاتي
چم ساعة المضت تطويها صفناتي
صفت حرگت دمعتي راسخة بذاتي
يا گومي اگضي اللحظات . طول الوكت بالحسرات
ومعلگه بحبل الأمل . بين المصايب والعلل . يا گومي من عفتوني
***************
شعل بيه هجركم يا هلي ناره
واضن مني اخذ هذا الوكت ثاره
أريد أسئل عگبكم شنهي الچاره
لان من حين رحتو الهسه محتاره
اتنطر ودمع العين . گطراته أتناشد وين
يا فاطمه ضعنچ رحل . بين المصايب والعلل . يا گومي من عفتوني
**************
عگبكم عالصبر ما عندي كل قدره
والوحدة الجليل أبحالتي أدره
وبكأسه الدهر جرّعني من مره
اصبر واعد انه أيام . واللحظة تنعد بعام
من الصبر گلبي اشتعل . بين المصايب والعلل . يا گومي من عفتوني
************
تعليق