تويت
الاطفال والعباس .لسان الحال //ابو ايمان
عطاشا . عطاشا وكل طفل للمشرعة عينه
عطاشا . عطاشا وننتظر عباس يروينه
نتاني ألجيته كلنه . يرد سالم أملنه
***********
شجاع وما يلين البطل عباس . خبر والكل تذيعه
گال بسيفي اطر جمعة ألأرجاس . وأوصل للشر يعه
نشمي وللظلم لا ما يطخ رأس . ضميره ما يبيعه
أبو ألغيره الوفي صاحب الإحساس . صعب نشكر صنيعه
برجال العرب عمنا ما ينقاس . عليهم با لطليعه
ولا مثله شبه في مُجمل الناس . ولا تحوي الوسيعه
كفلنه . كفلنه وبالعمر گال انه أفديكم
كفلنه . كفلنه وگال بيدي اليوم أرويكم
لذا بسمه هتفنه . يرد سالم أملنه
***********
فروسية وعزم من يركب الغوج . يرّج من يمشي گأعه
سفينة ألما تهم أتلاطم الروج . ولا همها ارتفاعه
سدود ألدنيه كلها تصبح بروج . في احدث صناعه
لا ما تمنعّه ولتمنعه العلوج . أذا ضهضب طباعه
لجل نصر الولي الكافل رفض توج . اجت تطلب شفاعه
واختار الشهادة وعاف السروج . لان طاهر رضاعه
ذخرنه . ذخرنه البيه أملنه وبيه تكفينه
ذخرنه . ذخرنه التنوزن بالذهب چفينه
يبو فاضل ندبنه . يرد سالم أملنه
************
على جمر الصبر والصبر چتال . ننتظرك ولينه
وبحال الذي ما ينوصف حال . يبو فاضل بقينه
صبح مجرى الدمع بالعين شلال . من حين البچينه
يتامه وما لگينه واحنه أطفال . صدر مثلك حنينه
عگب عينك بقينه بين الأنذال . ومحو طه علينه
واحنه برجعتك نترجه ينزال . هذا اليجرى بينه
صرخنه . صرخنه من الگلب وينك يبو فاضل
صرخنه . صرخنه وبا لدمه منا الدمع هاطل
على جيته صبرنه . يرد سالم أملنه
*************
اتركه الماي عمي ورد للخيام . وأسعدنه بوجودك
وصلت للخيم بعدك الظلام . واخترقت حدودك
يبوسيف العدل ناداك الإسلام . گوم ابذل جهودك
تقبل تنولي عگبك ها لأيتام . وانته العالي زودك
نعرفك ما تذل حاشاك وأوهام . ولايضعف صمودك
من الحين الرحت للنهر محتام . لجلنه أتملي جودك
عطشنه . عطشنه وما نهم العطش من ترجع
عطشنه . عطشنه والروتنه عيونه ا لتدمع
دموع ألي روتنه . يرد سالم أملنه
************
تشب نار الخيم والحيرة بالروح . بدت تأخذ محلها
والروح ابتلت واتخذت النوح . درب يهدي لأجلها
على درب الشر يعه النظر مشبوح . تصد للي كفلها
يعمي أطفالك وبالهم غدا أيبوح . وجهها بكل عللها
صفت گاع الحرب من دم المسفوح . لون احمر شكلها
وأجساد الأهل تمليها الجروح . ظلت محّد ألها
لفتنه . لفتنه أهل الحقد والحقد عاميها
لفتنه . لفتنه وها لحرم منهو اليحميها
منو الظل من أهلنه . يرد سالم أملنه
*************