تويت
عن التفجير والزوار //ابو يمان المجراوي
حب حسين من يجمعنه ... كل تفجير ما يمنعنه
*************
من يوم ألطف والهالساعه . خصمك ضل عايش بطباعه
كل يوم أيغيرها أوضاعه . ويحشد يحسين أتباعه
يوميه بحادث روعنه ... كل تفجير ما يمنعنه
*************
كل عصر يمر يا بن حيدر . شيعتكم بالدم تتعفر
إرهاب وتفجير وأكثر . حرگ وتمثيل وحز منحر
لن شيعه وحبك دافعنه ... كل تفجير ما يمنعنه
*************
قربان الروح انطيناها . ونموت بحبك نتباها
كل محنه أتحل نتخطاها . لا چن ما نگدر ننساها
والها أيسيل بدم مدمعنه ... كل تفجير ما يمنعنه
**************
حبينه حسين وما نندم . خل نتگطع خل نتألم
كل شيعي بدم خل يتوسم . مهما الواقع خط وحتم
والناصب خليه يسمعنه ... كل تفجير ما يمنعنه
**************
نار أدروبك لو زرعوها . كل زوارك ميمنعوها
كل عمله وحادث عملوها . جمرة حبك ما طفوها
چف حبك هوه الرافعنه ... كل تفجير ما يمنعنه
**************
عاهدناك بضلع ألزهره . هذا الجسم بدم أنعفره
لو دربك بيه موت انطره . يحسين ومنك ما نبره
لو أشلا احنه أگطعه ... كل تفجير ما يمنعنه
**************
لحسين الأرواح أتعنت . للطف وعالموت أتعدت
صاحت هيهات وما ذلت . وعروش الطغيان اهتزت
من دمك أصبح منبعنه ... كل تفجير ما يمنعنه
**************
من يومك يحسين وتعلم . من نزف ألشيعه أيصب ضل دم
وإتباعك عاشت ما تهتم . تزحف عالموت وتتقدم
وبدم المنحر وقّعنه ... كل تفجير ما يمنعنه
***************
كل زاير متعني بذاته . والروح أتسابگ خطواته
منذوره الحبك صيحاته. وبعيونه اتلالت دمعاته
مولاي أمصابك لوّعنه . كل تفجير ما يمنعنه
*************
تعليق