اليوم هلت يا نبينه انوارك ... اليوم هل طير السعد واسرارك

بيك وبعلي ... دوم نعتلي

اليوم هل طير السعد واسرارك

ــــــــــــــــــــــــــــــــــــــــــــــــــ ـــــــــــــــــــــ

منّك الزهره الزجيه ام الفحول ... وحيدر الدر نفسك وزوج البتول

والحسن ريحانتك يبن الاصول ... واحنه ننشد يا نبي وباسمك نكول

كل وكت نرجاك ... يا نبينه فداك

اليوم هل طير السعد واسرارك

حسين نورك هوه حق الله المبين ... ورايه للحك يبكَه زين العابدين

وثورة الباقر تضل سد الامين ... وجعفر الصادق سليل الطاهرين

يعله بينه الصوت ... ما نمل للموت

اليوم هل طير السعد واسرارك

الكاظم على الحك ثبت رغم الطغاة ... والرضا الحضره التجذبك للنجاة

والجواد اعظم علم صرح الاباة ... وعلمه سكّت من طلب دنيا وحياة

والعشك للدوم ... لحضه ساعه ويوم

اليوم هل طير السعد واسرارك

ومن علي الهادي اخذ حاجه وشفاء ... ومن تراب العسكري تنول الرجاء

وادعو يا قائم محمد هالدعاء ... سيدي نريد العجل هذا النداء

حجّة الله وسيف ... والدرب للخيف

اليوم هل طير السعد واسرارك

رحيم الحسيني الحسناوي