تويت
يا صاحبي الناس كلها مخابر .... الشكل مايعطي الحقيقة من الناس
وان كنت في دربٍ بعيد ومسافر .... تعرف خويك من ذهب ولا من انحاس
والعين همها هو جمال المناظر .... والقلب يتقصى الحقايق بالاحساس
قال المثل ياخوي إن كنت عابر .... للدرب خذ لك واحدٍ ايكون لك ساس
درب الحياة صعب وعنيد ومكابر .... يحتاج له صبر وتكون انت مراس
فيه الشقا ويا التعب والمخاطر .... لازم تكون جلد وفطين قاسي الباس
درب الحياة دربٍ طويل وجاير .... مافيه واحد مابتلى من كل لجناس
نوع البلايا بيننا ياخوي كاثر .... الكل فينا مبتلي والكل محتاس
مابي اعدد لك ولاني بذاكر .... لقلام ماتكفي ولايكفي قرطاس
الكل عارف فينا والكل فاكر .... والكل صاحب تجربة والكل دراس
ياصاحبي قلبي به الجرح كابر .... من القريب اللي أعزه من الناس
جرح العدو يبرى في يومك ولا باكر .... لكن جرح من هو حبيب يبقى دساس
وين الطبيب اللي على لعلاج قادر .... وين الدوا لجروح قلبي والاحساس
وان كان عذرك من صميم القلب صادر .... يشفي الجروح ويشفي القلب والراس
علي عبدالله العيسى - الأحساء
( الجرح الأبيض )
تعليق