ياذينه مصابك هاليوم...يابا الحسن يامضلوم
ننعاك وتاذينه المحنه...يامولانا وباسمك صحنه
يابا الحسن يا مضلوم

..................................................
بالشهر الربّك عظم كل شانه وكَدره...تنزف دم هامة اعظم والد للعتره
شلون جروح البينه تلملم همهه وتبره...والسيف بسمّه اجتاح اطهر هامه بطبره
زادت يابو حسين الونّه...يامولانا وباسمك صحنه

من جابوك لدارك دمعة زينب سالت...صاحت ياوالينه الدنيه لهظمك مالت
فزعات الابطال لفكَدك يالدر شالت...راعيهه انته وبغيابك هج رمهه وحالت
من بعدك ماضن تتعنّه...يامولانا وباسمك صحنه

اسمعهه شبولك تنعى لفكَدك يالوالي...ماجان فراكَك يابو الاحرار ابّالي
صد لاهلك شوف شصاير يابويه بحالي...ياوالدنه وخيّال الكلفات وجالي
ياباب الاعظم للجنّه...يامولانا وباسمك صحنه

من يوم الطاح المحسن ومصاب الزهره...نامت بضلوعي وشلّت كل حالي الحسره
خصمك لم كل حشوده واَذانه بغدره...بين مصابك صرت اَنه ومابين العصره
خيّب كَلبي المالم ضنّه...يا مولانا وباسمك صحنه

حيدر يبن الكلفات وبيت لايتامك...ريت الهامة تصد سيف الغادر كَدّامك
يامن بالحكَ مرفوعه بكل ديره اعلامك...نبكَه نطوف بحبك يالغالي وخدامك
شيعه وخدّام الكم كلنه...يامولانا وباسمك صحنه

يارايه الرفّت للحكَ دوم وبالعالي...يادمعة عيني بهاي الدنيه وموالي
جتالك يابو حسين وخصمك جتالي...ياجنه اضحت كل ساعه وكل لحضه تلالي
ابره الكم كل ناصب منّه...يامولانا وباسمك صحنه
يابا الحسن يا مضلوم
رحيم الحسيني الحسناوي