يهالوادم دحاجوني..درب المشرعه وينه
اريد انحر لاخوي الطاح..هلبت يلحكَ حسينه
ــــــــــــــــــــــــــــــــــــــــــــــــــ ــــــ
اريد اكصد لبو فاضل واكَلّه حسينك بغربه
اريدك تنهض النه بساع يالماتعرف الصعبه
اذا عَلمك تلوّه وطاح وبلا مايهه الجربه
اتجّيلك يتاج الراس وامسحلك دمه الضربه
واذا زنّدك على الغبره ..يسعر يا ضوه العتره
اكَولن ضعنه بين الكوم..والشامت شمت بينه

اشوفن خويه كَوم وخيل تتسابكَ على خيمنه
واشوفه بعيد ابو السجاد راح وما يرد يمنه
اسمعنّه ينادي الله بس هذه اليصبرنه
مثل حشد الجراد الكَوم يمه وزادت المحنه
اسمعه يصيح ابن حيدر..شاري الجنّه والمحشر
فلا هاب العطش والحر..وجيوش التعادينه

يعباس اليتامه شلون كَلي وبيش اواسيهه
صرت بين الذبح والنوح وبدمعاتي اساجيهه
عطاشى وما حضرني الماي وبيا عين اصد ليهه
صرت يا خويه عيني عليك وبيا عين اداريهه
يسيره تغربت جني..ماشاف الفرح سنّي
اخوتي تعذّرو مني..جا ياهو اليحامينه

شده فكري وصحت خويه الحرم يا جافلي بشدّه
شمر يم الخيم يحسين يم زينب تره تعدّه
جفيلي على النهر مصيوب وبروج الترب زنده
جفيلي ابن البطل كرار والمرسل اهو جده
جفيلي الما تركني بيوم..خلّاني بحزن وهموم
اريدك هسه خويه تكوم..كون وتلحكَ علينه

سفينه بلا شراع تحوم زينب عالدمه وصاحت
اخوتي توذّرو هاليوم وحبال الهضم لاحت
تدنت يم جسد عباس يم المشرعه وناحت
يتاجي ويا عضيد حسين يا جنة بعطر فاحت
بكَت زينب تجر ونّات..تتحمل هضم فجعات
تنادي بحسره ابو الكلفات..يفزع فارس حنينه

انه جبال التشيل ثكَال ما شالت مثل همّي
اجر حسره بونين واَه مامر بالخلكَ غمّي
عمت عيني على دم عباس ريت العالارض دمي
كَضو كلهم جتل ياناس طاحو خوّتي يمي
كَضوهم وسفه هالكفّار..شبّو بالدليل النار
اخوتي ومشعل الثوار..ابن الزهره والينه
يهالوادم دحاجوني..درب المشرعه وينه
اريد انحر لاخوي الطاح..هلبت يلحكَ حسينه
رحيم الحسيني الحسناوي