على اعتابك تلوج الدنيه يم لواك ... على مصابك تنوح العايله وتنعاك
يبونه ويا الف ونّه...يحيدر زادت المحنه

على مصابك تنوح العايله وتنعاك
ـــــــــــــــــــــــــــــــــ

يسباح الكَلب يا سلوة المهموم ... يسيف الله النصر بالموزمه المضلوم
يجفّال اليتامه ونشعة المحروم ... ولانه بفجعتك هذه الدهر هاليوم
رحت وامسى الحزن يابا الحسن بينه ... صفينه بغربه والمالم يساجينه
يساجي لكوثر الجنه .. يحيدر زادت المحنه
على مصابك تنوح العايله وتنعاك



سلاما ياعلي وكَلبي برمح مصيوب ... يعيني ويا امامي ويا اعز محبوب
اريد ابجي بدمع من دم وانوح انّوب ... يمن روحي لمصابك تنتحب وتذوب
بجي الراحوهله وكل ما اله ابجيلك ... دمع من روحي يابو الغانمه اهديلك
لدليلي الجويه تتعنّه..يحيدر زادت المحنه
على مصابك تنوح العايله وتنعاك



انه اذكر امي يم كَبرك توديني ... بنصركم يا ولي وحبكم توصّيني
بذكركم تغفه عيني ومن تغطيني ... تكلّي اندب علي البالشدّه يحميني
تكلي اندب حسين البالغرب جتلوه ... ضلم واتعنه للمنّ العذب حرموه
وعلى الجتفوهه تتعنّه .. يحيدر زادت المحنه
على مصابك تنوح العايله وتنعاك



مشيت انته وعفت زينب يتيمة بر ... مثل وركَه وبكَت بالحسره تتكسر
يبيرغ صيته ما ينضم يفاني الشر ... هظيمه بغيبتك سيل الغدر حدّر
شمت بينه الزمان المر بعد عينك...يبونه بحسرتي وشوكَي صحت وينك
يَعيد البالدمه محنّه .. يحيدر زادت المحنه
على مصابك تنوح العايله وتنعاك



غريب الفاركَ احبابه وصعب حاله ... تضل وحشه وغريبه بغيبته عياله
بعد عينك دليلي الونّه تبراله ... ويتيم الضل بعدكم منهو جفاله
يوالد للرعيه وجافل الايتام..مصابك ياذي عيني وبالدليل سهام
اسف خاب الكَلب ظَنّه ..يحيدر زادت المحنه
على مصابك تنوح العايله وتنعاك



شمس غابت على ارض المالت بحسره...وسمانه تهل دمعهه وتسجب العبره
يبو حسين الدماك تشابك الغبره ... صفت دنيانه بعدك مضلمه وحمره
نواسي اهلك يحيدر والطهر كلهم .. فدا نروح لاسمهم والدمه لدمهم
فلا مل الهضم منّه...يحيدر زادت المحنه
على مصابك تنوح العايله وتنعاك
رحيم الحسيني الحسناوي