من مشينه بلا جفيل العايله...واحسين بصوت صاحت كربله
ولطمت الدنيه ويه خطوات الهزل...تمنّت ويه اهل المكارم تنجتل
وا حسين بصوت صاحت كربله

ـــــــــــــــــــــ
احنه يمه من نولينه بلا اهل..صرنه بين النايبه وبين الاجل
حسين ابونه مخضب وهضمي اكتمل.. من شفت يم النهر جف الجفل
من شفت يم النهر راعي العلم..صدري احس ثكَل الجبل بيه الالم
بيهه زينب ونّه ابد ما تنحمل..تمنّت ويه اهل المكارم تنجتل



سمّعوني اهل الغدر اصعب كلام..وصار ابو الباطل على مصابي ينام
هضم اخوتي على الكَلب ينزل سهام..وتدري هالوادم دمه الراحو حرام
كلهه تدري احنه بفخر جدنه النبي..وشمتو بزينب علي بدرب السبي
روحي يمه بهالمصايب تنذهل..تمنت ويه اهل المكارم تنجتل
وا حسين بصوت صاحت كربله



علعلت روحي اليتامه بهالدرب..ويا حرم تدفع ثمن نار الحرب
من الغرب رحنه وسرينه احنه لغرب..بهالمسبّه وجتف اميه وبالضرب
وجّرو جلدي النشف منّ العذب..ويه اليتامه وفرهدوه الضل نهب
سكنه صاحت ما بعد يلحكَ عدل..تمنّت ويه اهل المكارم تنجتل
وا حسين بصوت صاحت كربله



شفنه ليل الما عرف شكله الغريب..ويا غريب مدمم وضامي وتريب
حال اخوي وشوصف بحاله الخضيب..ويا زمان ويا وكت صاير عجيب
عجبه خدري موجر بنار ولهب..وجتل ابو اليمه الفحل فوكَ العجب
روحي ما هانت ولا قبلت تذل..تمنّت ويه اهل المكارم تنجتل




اَنه بت حيدر علينه شما يكون..وكلشي لجل الحكَ يبو الاكبر يهون
صح دمع من دم تشلبه على الجفون..بس بكَت مثل الصكر هاي العيون
ذًلّت جموع الكفر من وكفتي..وكفكَفت بالدم يحيدر دمعتي
بيه صرخه وزلزلت هيهات اذل..تمنت ويه اهل المكارم تنجتل
وا حسين بصوت صاحت كربله



اَنه ادري الزهره تنضر حالتي..يوم اخوتي تذبّحو يم خيمتي
ادري بيهه تجر ونين لفجعتي..وتستعر ام الحياده لهضمتي
امي ثوره وزلزلت اهل الكفر..من ولوهه اهل الغدر وكت الضهر
وصاحت الحك زينب وشد يالفحل..تمنت ويه اهل المكارم تنجتل
واحسين بصوت صاحت كربله
رحيم الحسيني الحسناوي