يامن رجعت من النهر جود الفضل وين...خويه ارد انشدك عالجفل جاوبني يحسين

ـــــــــــ

واعدني يرجع بالعذب ويساجي الاطفال..هودل يمينه وما حمل صيحات العيال
حال السدانه بنص بحر صد خويه للحال..تاكلني نار المشرعه ودم تهمل العين
يامن رجعت من النهر جود الفضل وين..خويه ارد انشدك عالجفل جاوبني يحسين


خويه اعتلت غُبره وشفت تتباشر عداك..خويه وشفت راية علي من طاحت هناك
ياهو البعد راعي الضعن يتكفل لواك..حاجيني يبن المصطفى بحكَ فارس حنين


يحسين اَخَذ حيل الكَلب صوتك بالطفوف..نالت رماح اهل الغدر منكم والسيوف
جاوينه جفّال الحرم جا وين الجفوف..اَبعد علينه وغيّمت دنيانه بالبين


حدّر يكَلبي على النهر وانشد على الراح..ماضن ينام على الهضم وتعيكَه الجراح
ما ضن تاخرك عالحرم يا خويه الرماح..رمحك يبن حيدر علي بضلوعي رمحين


مر بينه وانضر عيلتك وانغر يعباس..ضلّينه يبن المرتضى وتتفرج الناس
خصمك تدنه على الحرم دكَ بيتك وداس..حزن المله حشاي انتصب يالساجي صفّين


رد يا عضيد لغربتي وشد عزمك وكَوم..رد وانصر ابن المرتضى وصد هجمة الكَوم
شو طوّل غيابك علي شو طول النوم..يارايه من حيدر علي يا منبع الدين
رحيم الحسيني الحسناوي