لاهلك ترد يابو الاكبر بالسلامه...دمعتي بفكَدك صفت للهم علامه
المن مخليني...والعلل تاذيني
دمعتي بفكدك صفت للهم علامه

ـــــــــــــــــــــــــــــ
ــــــــــــــــــــــــــــــــــــــــــــــــــ
يجيني الليل هذه الليل يسلب بالهضم عمري..وداري بدمعتي ورسمك ونيني المارحم صدري
مشيت لغربتك واَنه النوايب حالفن دهري..انوح شكَد ولوج اشكد لحد ياساعه ماادري
ملّت احزاني وشجت مني الليالي...شارد اسولف من بعد عينك يغالي
جم جرح ينهيني...والعلل تاذيني
دمعتي بفكَدك صفت للهم علامه

طيور الرايحات بعيد ردّن وجّن لهمي...كسر خاطرهن البجلاي بجّاهن ثكَل غمي
عليله واهلي عني بعيد راحو والدي وعمي...واخوتي الكَوطرو لبعيد دمهم يسكن بدمي
من مشو صارت على ضلوعي المصيبه...فاركَ كليبي وخسر روحه وحبيبه
منهو الي يواسيني...والعلل تاذيني
دمعتي بفكَدك صفت للهم علامه

بعيده وهمه عني بعيد خالي الوالي صيوانه...ضَعَن بيده الهجر وصباي نار الكبره نيشانه
يديوان الكرم والخير ابن الزهره ديوانه...واحنه لكل بشر محتاج كَوت وغيره يلكَانه
احنه حيدرنه الفحل راعي العداله...وفاطمه ام المؤمنين اصل الرساله
ما تملهم عيني...والعلل تاذيني
دمعتي بفكَدك صفت للهم علامه

منهو اللي يجيني اليوم جايبلي الخبر منهم...هلج ردّو يبنت حسين كَومي اخذي الحمل منهم
واشوف الاكبر وجسام والاصغر واعاتبهم...واهد روحي على فيهم شوكَ هلبت وارتوي بشَمهم
انه روحي التلتهب محد يلمهه...ما يحمله اعظم جبل بالدنيا همهه
منهو اليدليني...والعلل تاذيني
دمعتي بفكَدك صفت للهم علامه

اعاتب عمي لو جسام لو ام الهضم زينب...هذيج البالمصايب سيف ناره على الشدد تلهب
خذت ويه المصيبه هموم فوكَ الكلب المعذّب..مشت ويه الفحل عباس ذاك السيف المجرب
كوطرت لارض الغدر بنت الحياده...بيهه من حيدر علي روح القياده
والالم يجويني...والعلل تاذيني
دمعتي بفكَدك صفت للهم علامه