البرنامج الكامل لليوم الثاني من محرم 2012مع يوتيوب خاص باوزان القصائد(للرواديد)

ـــــــــــــــــ
ابوذيات نعي

ــ

غريبه ومالي والي منخوتي
ينوح الليل ويجن منخوتي
منهو يلوم كلبي منخوتي
بعيد امسو وانه بهاي الوطيه


وحيده ومالي احد من يلمني
وصكَيع البالليالي من يلمني
جمر يسعر ييمه من يلمني
ويوزع جروح مني بهالثنيه


الارض من تعطش تنادب سماهه
وانه الضلت دمع جاري سماهه
عليله وفاكَده احبابي سماهه
الزمان الجار بسمومه عليه


لطميه(ثكيل)
اَنه العليله.....دمعي اسيله
اجرع لهيب النار...وحشه وغريبه الدار
دمعي اسيله...دمعي اسيله
ـــــــــ

انه البارض المدينه الوالي خلاني....انه الما حسبت لو لحضه ينساني
اخوتي الكوطرو وازدادت احزاني....انوح على الهجر وانوبه ينعاني
اَنه لمصابي..يوجر عتابي
ما عندي كل اعذار...وحشه وغريبه الدار
دمعي اسيله...دمعي اسيله



سألت اَنه الطيور الرايحه لدربك...كلت يابا الطهر هلبت وامر كربك
واشوفن نايحتكم وابتلي بحربك...بلاء اللي تريده وصبرك لربك
اصبر وواسي...بيك التماسي
واَنه ادري خصمك جار...وحشه وغريبه الدار



وحيده وسلوتي دموعي وهضم كَلبي...مصايب يا زماني بكل وكت تربي
اصد وانخه واكولن الله بس حسبي...الك يا خالقي الشكوه والك دربي
لله ورسوله......وسيفه وبتوله
ضلمه وتلوج استار......وحشه وغريبه الدار




شاكولن وانتم بلا كلمه عفتوني....وحيده وبالهضم والهم تركتوني
احاجيكم ولا ضنكم تحاجوني....انادي وما حصل لحضه وتنادوني
بيه النوايب.....كل المصايب
بيه العلل تندار...وحشه وغريبه الدار
دمعي اسيله...دمعي اسيله



منو البعدك يبويه اللي يواسيني...الوجن والدمع يغفه بوسط عيني
جنت انته التداويني وتباريني...بقيت بغيرك المالم يجاريني
كثرت دموعي....ذابت شموعي
اشكيهه للجبار....وحشه وغريبه الدار
دمعي اسيله....دمعي اسيله



عليكم ما بطل حزني وصعب حالي....انه الون والمصايب بويه تحلالي
بُعدكم يا عزيز الزهره جتالي....ونيني الما تركني وهضمي موالي
اهل الوشايه....ضد الولايه
شماته هالكفار...وحشه وغريبه الدار
دمعي اسيله....دمعي اسيله











لطمية ثكيل
عليله اَنه وعلى جفوني الدمع جاري..على اهلي الغربو ما تنكَحم ناري
بقيت بشدة احزاني....ابوي لوحدي خلاني
على اهلي الغربو ما تنكحم ناري
ــــــــــــــــــــ
انه الكلب السليب الما حضه بماراد...وانه جلاي العليله بفركَة السجاد
انه جروحي بهضمهم ما تحدهه اعداد...بكيت محيره وضيم المصايب زاد
على وكت الشمس لمن تفاركني..تعت بيه المنيه ومن تعاتبني
اكول فراكه اَذاني....ابوي لوحدي خلاني
على اهلي الغربو ما تنكَحم ناري



انه زغيرة وبعد منهو اليراعيني...بعد منهو اليمر بيه ويحاجيني
ابوي بجفه من يدنه ويداويني...احس روحي بفرح تهوى وتناغيني
انه مصاب البعد ما يرحم بحالي....تشب نار البعد وتواسي دلالي
منو المن بعده ينعاني...ابوي لوحدي خلاني
على اهلي الغربو ما تنكحم ناري



حسبت وما صدك يا والدي حسابي....انه وشلت الحمل والهم غده ابّابي
ينيرانك يبويه التغفه باعتابي....تدوهني وتحطني بعلة مصابي
علت بيه النوايب راحن عيوني....عجيبه الما بعتهم وسفه ينسوني
صبح دهري العلي جاني....ابوي لوحدي خلاني




ونيني الما بطل مل واَنه مليته....يطير الرايح اَنه بدمعي وصيته
كلتله ان جانك تشوف الترك بيته....اريدك تنعه حالي وكله تانيته
اتاني وما رجعلي وما رحم دمعي....اون مره واذوب ويحترك شمعي
ابوي فراكه جواني....ابوي لوحدي خلاني
على اهلي الغربو ما تنكحم ناري




اذكرك يا علي الاكبر وهل دموع...على فراكك صبح كلبي بحزن مصروع
دفعت اَنه العمر والون صبح مسموع....عمر بس بالهجر وسنينه شو مدفوع
انه الضلت بعد محد يواسيهه...غريبه وبالغرب ياهو اليدليهه
صفالي الواشي جيواني....ابوي لوحدي خلاني
على اهلي الغربو ما تنكحم ناري




اسمعك يا رضيع الفاركتني زغير....تكول اكبر وارد مثل الجنح بالطير
ارد وانسى اليلالي الما ردتهه تصير....جبير الهم يبن سيد البريه جبير
جبير وما حصل من بيه يساعدني.....وحيده ومالي والي اللي يرافكني
ابوي بصبري وصاني.....ابوي لوحدي خلاني





نزله
راح ابو اليمه وضعن زينب والاكبر..يا علي
والجفيل براية الحك سيفه كبّر..ياعلي
ـــــ
حدّر الجافل ضعونه والدرب لاجله انسله
من عرف بيت الاطايب دربه يطلب كربله
هذه جسام وعقيلة حيدره وليل اعتله
هايه دنيه على الهواشم بالمظالم صايله
ثارو على الباطل وما هابو الشر..ياعلي
وافو لدين الرساله وحيدره الدر..يا علي



جن دربهم للجنان وجن سبك طير السعد
من علي القالع عزمهم من محمدهه المدد
جافل ضعون الهواشم يفرح بيوم الشدد
ما يهمه بجيش اميه ولا يهم عده وعدد
هذه زنده من الوصي الضيغم تحدر...ياعلي
هذه راية حيدره الدك ثايه بالبر..يا علي

زينب رباة المعالي تدري بالبيهم يمر
والكلب منهه على اخوهه وجافل الحك جالجمر
تنضر لجوده وحسامه وما يضل بيهه الصبر
تفدي لترابه ويمينه كل كلبهه والنضر
ياذي زينب عضم اخوهه لو تكنطر...يا علي
منهو غيره لخيمة اخته وكومه ينغر....ياعلي





ضلمه بطفوف المنايه وما حصل من ينتصر
تفدي زينب نحر اخوهه تفدي لسنينه العمر ل
تنتضر يا حيدر اهلك نصرتك من تنتضر
هيمه وبنص الخوارج لا عليهم تعتذر
انته سيفك راس ابو الشر بيه تطبّر..يا علي
والهضم بالطف على ضعونك تكَدر....ياعلي





ماهدت زينب يبوهه من وصل ضعن الضيوف
حست اصوات المنايا تكصد الخيمه وتطوف
جنهه عرفت بالخيانه وجنهه حست بالالوف
جنهه شافت عالشريعه مكطعه بدمهه الجفوف
جنهه عرفت يم اخوهه هيه تعثر ...يا علي
جنهه شافت جفه بسيوف وتبتر...يا علي
يوتيوب باوزان اللطميات
http://www.youtube.com/watch?v=WWD6-aFxZII