اَنه امك يحسين...جيت ادورك وين
وينك ياتعب رباي.....من عيني اسكيك الماي
جيت ادورك وين
ـــــــــــــــــــ
انوحن والعلل تتوسط اضلاعي...منو الينحب عليك ومنهو الناعي
ييمه بلا كلب كلبي وهوه شراعي...شاكولن والحزن وسطي ولوه ذراعي
مهرك يالحر ناح...كثرت بيه جراح
واَنه بنص هم بلواي.....من عيني اسكيلك ماي
جيت ادورك وين



على طفوف الدمه اتوازن حزن عمري...بكيت محيره وماضل تره بصبري
اجيتك واللهيب يكطّع بصدري...وسجاجين الهضم ما تفتهم عذري
يمه بصدري النار...يا عمود الدار
ضاكت بالشده سماي.....من عيني اسكيك الماي





عجايب ما شفت يمه الجره بنحرك.....صدك هاي الحوافر تردس بصدرك
عجيبه سيوف اميه تطبر بضهرك.....خلص صبر الخليقه وما خلص صبرك
مُر يصبي العين...ما رحمني البين
اعثر صرت بممشاي.....من عيني اسكيك الماي
جيت ادورك وين




اشوفك لازنود ولا صدر لا راس...اسمعك تلفض بدين الرساله انفاس
عجيبه وما نغر ذاك البطل عباس.....ابو الغيره وعجيد العليه والنوماس
وينه ساجي الكوم....عالنهر مدموم
جود الحر طر حشاي.....من عيني اسكيك الماي





طفل وين الطفل ذاك الصعب حاله.....تناثر بيت ابوهم تاهت عياله
يزينب بالمصيبه بهمهه تبراله......تصيح على العلم والوالي شياله
تجهب وتنخاك......يالفحل بحماك
الحك وصلتني عداي......من عيني اسكيك الماي





يحيدر ماتمر بيه وتلاكيني......على مصاب الحسين الساعه واسيني
ضعت بين الجثث ياهو اليدليني.....دمه الصبّت ولا دمع الهوى بعيني
دمعي صب دموم.......والكلب مهموم
طاح بجرحه الوفاي......من عيني اسكيك الماي






انه الزهره الزجيه وتالم جروحي.....كضيت بلا سبب شافت الم روحي
يسيل بهالهضايم والوجع نوحي.....صفت تنزف فجايع توجر سفوحي
راح ابو الاحرار...اه يحامي الجار
ما بطل دوم بجاي..........من عيني اسكيك الماي
جيت ادورك وين
رحيم الحسيني الحسناوي