يبو السجاد.....حزن ينعاد.....ابطل بجاي هيهات
رحت عطشان.....هذه الماي......يملي بطون حيات
اجيتك والكلب يبن الامامه يلوم...على مصابك احس صوت المنايا يحوم
انه بلاكم اضل بين العلل ملجوم...لبست اَنه الحزن لايك عليه هدوم
انه ادري بالنوايب جرّحن خدي.....انه شعندي يبو الدر غيرك شعندي
اضل للموت.....اصيح بصوت.....يبو السجاد مضلوم
منايا تفوت.....صفه الطاغوت.....يغز بصدري رميات






انوحن والزمن وي نوحتي من ينوح.....يردلي بهالمصايب ساعه مني يروح
على طفوف الشبول اجرت عليهه سفوح.....صبح حزني لحزنكم كل وكت مسموح
يبيت اهل الرساله الموته بمحرم.....يمركب للنجاة الصوته نزف الدم
يبو الاجيال.....عليك الحال.....فلا مر يوم بافراح
خضيبه رمال.....تواسي عيال.....عله بكلبي تبات






عليه من العلل شدّت جثيره اليوم.....ولا كف العتب هذه الكلب واللوم
انه شلون اشرب وخير البشر محروم.....واخوه من الغدر فارك هله ومسموم
انه شلون شارب وزينب بلا وليان.....رحل ذاك الفخر يوم الهضيمه الجان
سباياهناك.....غدو برجاك.....تنوح العيله عليك
تدور عداك.....تدوّر لواك.....صاحو حيدر المات






انه بليلي من انوحن وانفرد ببجاي.....يضيع بفكدتك يابا العليله دواي
انه لجنة عدن يمك يحر ممشاي.....بعتلك هالارض والدنيه ويه سماي
بعت روحي وشريتك يالابي بعمري.....اشبلك بالكلب نار ودمع يجري
الك وفاي.....يزين دواي.....اَنه برحمتك دوم
تضل وياي.....انه بلاراي.....تجري بصدري عبرات






سوالف والسوالف كثرن بكَلبي.....تحيّر بالغرب يبن الطهر دربي
يمن سلمك سلم حربك يصل حربي.....اريدك ترحم بهاي الشدد تعبي
اريدك تنغر وتاخذ عبد يمك.....يحط روحه بضريحك يشرك بهمك
اطوف هناك......رغمهه عداك.....اصرخ جيتك يالحيد
يغالي بلاك.....اتيه سماك.....اضل بالماضي والفات






يطيف البالشدد بالعليه يرويني.....ينبع البالكرم يوم اضمه يسكيني
يداي الضل نبع بيه ويداويني.....ينور البالحقيقه بنوره يضويني
يصيوان المعارف والفخرعباس.....يتاج على البشر والرايه والنوماس
ينور العين.....ينور الدين.....باكت حكَكم اشرار
تلاوه البين.....غدر بحسين.....واَنه بصدري حسرات
رحيم الحسيني الحسناوي