قضى.. كل الكلام اللي.. قدر.. يشرح لك آلامي


قضى فيني الشعور.. وما خلصت اتألم.. لبُعدك




كذا تجني علي،، وتموّت الباقي من أحلامي


يا آخر ما بقى فيني.. كذا.. تستسهل بصدّك




أنا شسويت.. غير إني وثقت بشي.. قدامي


أشوفه.. مثل ما اشوفك.. واحسه في دفى يدك




كثر فيني العطش،، من عقب ما حسيت بك ضامي


كبر فيني الأمل،، من عقب ما صرت الأمل عندك




رجعت أكتب شعر.. لاْنّك بغيت تصير إلهامي


وبغيت.. أكتب لك.. اللي ما تغنى قبلك وبعدك




طفولة.. ميتة فيني,, بغتك تجدد أيامي


تركت الذاكرة لك لو تبي.. تآخذني لمهدك




تكبّرني.. بكيفك.. لين ما ترسم لي احلامي


تعودني.. على الشي.. اللي "ودّك فيه".. و"ما ودّك"




فديت بذكرياتي ..كلها.. وعمري وأقلامي


تكسّر ماتبيني انسى ..عشان أعيش لك وحدك




تنثرت.. بكثر ما كنت أبيك تشتت أوهامي


تلملمت.. بكثر ما كنت أبتحمّل ولا آهدك!




شعرت.. إنك "ملاذي!" من عواذل جرحي الدامي


شعرت إني.. أبتغلب على الدنيا.. وأنا.. حدّك




كذا.. تجني علي.. بغيابك اللي توّه أحلامي


أنا.. شسويت لك.. حتى.. تصحيني.. على فقدك!!