تويت
ركب السبايا!للشاعر حسين الساعدي
مشى ركب السبايا!
مشى ركب السبايا ونادت أبصوت
أنه زينب الحره الهاشميه
وتذَكرت خدرهه اوذيج الايام
العاشتهه اويه حماي الحميه
بِسم زينب صدك جانوا يسمعون
بس ما شاهدوا بنت الزجيه
هسه اتيسرت بيد اليكرهون
والكفال طاح اعله الوطيه
صدت للنجف كالتله اشلون
حماي الحمى اوبنتك سبيه!
ويل وصيت بيه البطل عباس
تعال ابعينك اوشوف الوصيه
يبويه اللي كفلني وجيت اوياه
تاج الراس أبو النفس الأبيه
لتخافين كَلي وانتي بحماي
عوفي اجيوشهم كلها عَليه
أنه العباس يازينب تعرفين
وسيفي ابيمنتي والنفس بيه
لقابلهم الوحدي اوداعت احسين
وأطشر جيشهم بالغاضريه
شَسولفلك يبويه وأبتدي امنين
على شبلك يحماي الحميه!
صدك وفه يبويه النصرة احسين
اجفوفه اهناك قدمهن لأخيه
طلبنه الماي منه وكال موجود
لجيب النهر كله الكم هديه
ونزل مغتاض ولعدوان شافوه
أسد وانهد عليهم بالثنيه
ابو فاضل ابزوده استولى عالماي
لكاه بارد وِهُو ناره سريه
كال اشلون اشرب قبل الحسين
عود اشرب وراه شربه هنيه
شال الجربه بيده الصوب الخيام
اوتلكوه ابغدرهم أل اميه
صابو جربته ابزخات السهام
ولا جفين عد راعي الحميه
وسهم منهن العينه اتعنه محتام
وعمود البين راواه المنيه
يبويه الفخر كله ابزود عباس
أبد ما قصر ابذيج المسيه
مثل ام البنين الرفعة الراس
أقمار اتبرعت لأجل الزجيه
شسولفلك يبويه ابيوم عباس
كُمر وبكربله طفوله ضَيه
حسين الساعدي
تعليق