تويت
يا ليل وين الأحباب .. يا ليل دلالي أنصاب
طالت غيبتهم .. وانطر جيّتهم
يا ليل دلالي أنصاب .. يا ليل دلالي أنصاب
***********
على حر الجمر يا ليلي اتنطر
واتاني بدمعتي الحين الفجر ينطر
اسولف بيهم ودلالي أمكدر
وأحس بضلوعي نيران الألم تسعر
مالوم گلبي الولهان .. مالوم ويشب نيران
تجرح ذكرتهم .. وانطر جيّتهم
يا ليل دلالي أنصاب .. يا ليل دلالي أنصاب
***********
مشوا لاچن مشت ويّاهم أفكاري
واحسّب كل دقيقه وتچوي بي ناري
اگول أليا دهر دمعي يضل جاري
وتضل وحشه وخليه ومظلمة داري
ونيت من الآلام .. ونيت طول الأيام
دامت سفرتهم .. وانطر جيّتهم
يا ليل دلالي أنصاب .. يا ليل دلالي أنصاب
***********
ذبل من الدمع جفني وعمت عيني
وألم فرگاهم ايغوص بشراييني
إذا گلبي أنجرح منهو اليداويني
عگبهم والمنايا ألموتي تهديني
سليت واصبر چم دوب .. سليت والروح أتذوب
تصعب فرگتهم .. وانطر جيّتهم
يا ليل دلالي أنصاب .. يا ليل دلالي أنصاب
***********
عليهم من تحل يا ليلي أتحسر
وأعيش بظلمتك ويّه الدموع اسهر
غدت كل ساعة منّك چن سنه وأكثر
صعب تدري على المثلي سهر تگدر
أيّام مرّن واليال .. أيّام وانه بهل حال
اذكر صورتهم .. وانطر جيّتهم
يا ليل دلالي أنصاب .. يا ليل دلالي أنصاب
***********
اناطر والدربهم شابحه عيوني
واگول بنفسي أحبابي يذكروني
عليلة ومنسگم دلالي يدروني
وانه بهل حال اريدنهم يشوفوني
ما هان يا ليل الراح .. ما هان وشلون ارتاح
روحي ألحبتهم .. وانطر جيّتهم
يا ليل دلالي أنصاب .. يا ليل دلالي أنصاب
***********
طويلة أللحظه من دون الأهل يا ليل
وشديدة اللوعة لو هاجت تهد الحيل
وحيده أبداري وإسهام الزمان أتعيل
ولآمر أعله بالي أحبابي عني أتشيل
ضليت بين الآمال .. ضلّيت والهم چتّال
انه أبنيّتهم .. وانطر جيّتهم
يا ليل دلالي أنصاب .. يا ليل دلالي أنصاب
***********
الخادم ابو ايمان المجراوي
07711208819
07801138315
07400661459
يهلي وين . عازمين أعله الرحيل
يهلي وين . وانه جسمي أصبح عليل
آوياكم أخذوني . لا تخلوني . يهلي وين . يهلي وين
***************
يالتعدون ألسفركم بويه ويّاكم أريد
لا تخلوني وحيده والمرض بيه شديد
بيه محتفه النوايب يا هلي وتطلب مزيد
المن أتوجه عگبكم لو گطع عني البريد
حالي حال . شمعه ذابت بالظلام
حالي حال . عيني ما تگدر تنام
حين عفتوني . لا تخلوني . يهلي وين . يهلي وين
***************
عالدرب رابية أعيوني وانطر بلهفه وأمل
راح أعيش أسنين عمري واحمل أعتاب وزعل
ليش يحبابي تركتوا بتكم أبين العلل
طفله وبخدي سواجي تحفر أدموع الوجل
بيه نار . تسعر الطول الأمد
بيه نار . ادري ما تخمد بعد
ذابت اجفوني . لا تخلوني . يهلي وين . يهلي وين
***************
على أفراش العلّه راكد يا هلي جسمي النحيل
والدمع ما يرضه يسكن ويه كل شهگه يسيل
صوّب البين أبحياتي سهمه وآهاتي الدليل
وعتنه الداخل فؤادي ينصب أركان العويل
دهري جار . بيه من أول عمّر
دهري جار . وأصبحت للهم وكر
لو تشوفوني . لا تخلوني . يهلي وين . يهلي وين
***************
كل مكان أبداري ذكره من اصد بيها افتكر
اهنآ گعدنه اهنآ حچينه اهنآ نصليها الفجر
علي اخوي وعمتي زينب جاسم وعمي البدر
اصفن أوعه الگه خيالي ما يمل هذا الذكر
ما نسيت . صوت أبوي وضحكته
ما نسيت . مگدر احمل غيبته
راحن أعيوني . لا تخلوني . يهلي وين . يهلي وين
***************
چلمة اموادع يگومي تصعب أبلفظ اللسان
وانه افارگ أغلى ناسي كاتب أعليه الزمان
كون أموتن إلف موته ولا يكون البيّه كان
طفله معلولة وغريبة وحدي عشت بهلمكان
كون أموت . واطوي صفحات الحياة
كون أموت . عندي ما ضل أمنيات
يالهجّرتوني . لا تخلوني . يهلي وين . يهلي وين
***************
والله يصعب وصف حالي على كتّاب الشعر
والحروف أتخونه كل من حاول بقصتي يمر
بالضعن أول يتيمة انصابت أبسهم الهجر
انه وانه أول سبيه للحزن راحت يسر
ناعي صار . گلبي ينعى ألحالتي
ناعي صار . من عظمها مصيبتي
من تذكروني . لا تخلوني . يهلي وين . يهلي وين
***************
الخادم ابو ايمان المجراوي
07711208819
07801138315
07400661459