( هوسات )

نزل للحومه يرعد صاحب النوماس
مثل بركان ثـــاير طشـّراهه الناس
ايصيح ان تنكروني هـا أنه العباس
مشدوده الدنيه بـچفّ ايدي

** ** ** ** ** **

مثل عبــاس ابد متجيــب ولاده
إجه التمرين چنه ابمشيه يتهاده
دگ جدمه اعلى راگ المشرعه وناده
يـگربلي الما رايد راسه‎

** ** ** ** ** **

من حيدر أخذ زوده الـچفيل وسار
لبس خـوذة جلاله وجبه من اصرار
فر الجيش بيده وصوب إخــوه اندار
وناداه لعيونك أفنيهه

** ** ** ** ** **
هله بحيد الشريعه من وصل ليهـه
طشــّـرهه الزلم باربع نواحيهــــه
وجمّعهه ونثرهه ورد سحـگ بيهه
وبسيفه الـــباشط ساواهه

** ** ** ** ** **

حلف عباس بالله وحلف بالنوماس
يـگضي الـگوم كلهه وزمرة الأرجاس
ومن مر على الوادم حبست الأنفاس
وماتت من شافت حد سيفه

** ** ** ** ** **


زهـگ سبع الشريعه وما گدر يصبر
لمن شاف اخوه احســين متحير
گله ارخصني يخويه للحرب أسدر
وانزل للحومه وأفنيهه

** ** ** ** ** **

لمن شاف اخوه اعلى النهر ممدود
طب للخيمه ينحب طيح العامود
إخو زينب عجيد ابصبره ماموجود
بس فـگد الكافل هد حيله

** ** ** ** ** **

موش انصاف هذا ولاعدل يسلام
بت حيدر ســبيه اوتنوخذ للشام
لو حاضر محمـد هم قبــل تنظام
وتطب بسلاسل مـگيوده

** ** ** ** ** **

مـگيوده وعليهه امشوبحه الأنظار
وگبل حيدر إبوهه لو تجي امن الدار
بدروب المدينـــه مايخلـــي انوار
وعيون اخوتهه اتباريهه

** ** ** ** ** **

گبل گـــالوا الحره اوديعــة الخيرين
عجب ماشفنه واحد حامه لخت حسين
صفت بين الأجانب تصفگ الـچفين
وتنادي ومامش وفايه



خادم أهل البيت
لقمان البدران