امك انا جسام ...... ليش تنام حاجيني
كلفه تره الايام ....... والالام تاذيني

كطعوا وريدك + كلبي يريدك
ليش تنام حاجيني
____________

تطير الروح بانفاسك .... ولو نزلت تحط بهواك
ولو نسمه تجي خلافك .... اشمه وانتظر طرواك
يجاسم حتى باطيافك .... تطيب العين من ملكاك
واخافن لو عدو شافك .... بساعة غدر يتولاك

عيني تخاف عليك .... بالاحلام يا يمه
سهد وعشك وي خوف .... اعله الولد ملتمه

التمت يجاسم + تاليه نايم

ليش تنام حاجيني
_____________

يجاسم امك بهل اليوم ..... بكومه هموم يوليدي
اجيت بوحده عندي علوم .... من العود وشبيدي
تطلع تنصر المظلوم .... بالميدان تحديدي
يمه محدد ومقسوم .... اسكي الحومه بوريدي

حنت زفافك هاي ... وبلا ماي بالحومه
امك فكدت الراي ... ويه بجاي مهظومه

يبني يغالي + يعزي ودلالي

ليش تنام حاجيني

________

يجاسم يبني يامدلول .... هذي ساعة الشده
عدل عمامتك والطول .... وسيفك طلعه وشده
عمك بالمعاره وحيد ... والعسكر وصل حده
عدوان ولفتنه تريد .... تكطع نحر منعنده

عودك كبل ميموت ... وصه وكال حفضيه
ابنج لازم يفوت ... وسط الحرب يسبيه

سلمني سيفه + يكلبي ورهيفه

ليش تنام حاجيني

_____________

لبس لعمامته وسدر .... راح لعمه يتوسل
رده لامه ابن حيدر .... ينزل حرب مايقبل
كامت عدلتله السيف .... وتعكد شدة المحمل
ياحيف والف ياحيف ... يبن المصطفى المرسل

امك فجعه يصير..... بيك اليوم وتشوفه
وامي سبيه يصير.... بضرب سياط مجتوفه

طفوفك طفوفي + يدنيايه شوفي

ليش تنام حاجيني
_____________

طلع للحومه يتبختر .... ابن الحسن طب بيه
ابد ما همته العسكر .... طي الصحف يطويه
ظلت علارض تفتر .... منه الخوف تاويه
ذكره بعهد خيبر .... وذي الفقار جاويه

الماي التبده شلون .... لمه يصير وترده
وشنهي الذي وداك .... لشسع النعل وتشده

شده اعله شده + مايك تبده

ليش تنام حاجيني
_____________
حيدر العذاري