3 دكات جواب الرايه

يارايه ظلينه بيسر ... بالغاضريه
عباس نايم علنهر ... جسمه رميه

يا رايه سدر لنهر... وانتي بيمينه
ومن كبل ما راح النفل ... واعد سكينه
وننتظر ظلينه بوجل ... تاخر علينه
شنهو العذر يابو الفضل ... للفاطميه

يارايه ظلينه بيسر ... بالغاضريه

ردت الرايه بالالم ... وبدمعة وونين
تكله يبضعة فاطمه ... انكطعن الجفين
والجود مصيوب بسهم ... والثاني بالعين
والكمر مكسوف بعمد ... جته المنيه

يارايه ظلينه بيسر ... بالغاضريه

يارايه راحت هيبتي ... ودارة الايام
المتون ورمة بالضرب ... بالنار الخيام
نسوان هجت بالفله ... ومتطشره الايتام
منهو اليلمه يلعلم ... هاي المسيه

يارايه ظلينه بيسر ... بالغاضريه

تكله يزينب عالمه ... بالي جره وصار
لمن طلعتي مخدره ... من عتبة الدار
والاخوه دارت محملج ... وبعز النهار
تالي وحيده بكربله ... ومامش حميه

يارايه ظلينه بيسر ... بالغاضريه

اه الدهر يارايتي ... بالطف غدرني
عباس اخويه بنومته ... والله ضهدني
وياه اجيت من الوطن ... هو يردني
ام البنين الوصته ... ابت الزجيه

يارايه ظلينه بيسر ... بالغاضريه

ياهو اليردج للوطن ... من الميامين
الكمر نايم علنهر ... مذبوح الحسين
ابدان ظلت علثره ... كلهم مطاعين
ما الج غير البلغري ... حامي الحميه

حيدر العذاري

3 دكات

لو ادري ماجيت بضعن للغاضريه
تحمل الماي من النهر عندك وصيه


*********
1

عباس يومك علنهر ما شابه يوم
وحيد الحسين بكربله والنهر ملزوم
واطفال من حر العِطش لن كامت تحوم
وهذي سُكينه التنتظر منك الجيه

لو ادري ماجيت بظعن للغاضريه
تحمل الماي من النهر عندك وصيه

********
2

ياخويه هاي ام الطفل تناغي لطفله
وتكله عمك علنهر ظنوة فحله
ام البنين الربته شامخ اصله
هذه كمر من حيدره حامي الحميه

لو ادري ماجيت بضعن للغاضريه
تحمل الماي من النهر عندك وصيه

*********
3

انته الحديت بناكتي وسيّرت ظعني
أُختك امانه بشاربك عباس ردني
مابين عدوان اصبحت والدهر ذبني
ايتام عطشانه ونسه ظلت اليه

لو ادري ماجيت بضعن للغاضريه
تحمل الماي من النهر عندك وصيه

**********
4

عيلتك ظلت بالجمر يبن الميامين
وانه بامل متنطره وانظر للحسين
ماشفت نبله الصابتك طفتلك العين
بس وضعه متغير شفت ابن الزجيه

لو ادري ماجيت بضعن للغاضريه
تحمل الماي من النهر عندك وصيه

***********
5

يامن جنت انته الملك واختك اميره
عباس من بعدك وكع راس العشيره
وينك يراعي الموزمه زينب اسيره
سلمن اديك وكطّعوا ياخويه اديه

لو ادري ماجيت بضعن للغاضريه
تحمل الماي من النهر عندك وصيه


********
6

عباس من حر الشمس الوجوه ورمن
وجروح البكلبي جمر نيران يدن
نسوان كله بالظمه من الخوف فرن
ونيران تسعر بالخيم تلهب عليه

لو ادري ماجيت بضعن للغاضريه
تحمل الماي من النهر عندك وصيه

********

7

اختك يسبع الكنطره من غير والي
راواني بعدك هلوكت سود الليالي
واكع اعله الشاطي العلم والجود خالي
وانحب عليك بكل صبح وبكل مسيه

لو ادري ماجيت بضعن للغاضريه
تحمل الماي من النهر عندك وصيه

*********
8

مكسورة الخاطر صرت ياخويه تدري
والعبره توكف بالحشى وتخنك بصدري
بهليوم صوت اختك طلع وانهدم خدري
لا شفت هذه الصار واتمنى المنيه

لو ادري ماجيت بضعن للغاضريه
تحمل الماي من النهر عندك وصيه

*********
9

بذيالي اتعثر كمت ماشوف دربي
ينايم اعله المشرعه مزكت كلبي
واحزاني كله اجمعت يعيوني صبي
دار الزمن يلمرتضى بكربلا بيه

لو ادري ماجيت بضعن للغاضريه
تحمل الماي من النهر عندك وصيه

*********
10

وينك يفقار الغري الله واكبر
نحر اليشمه المصطفى بالدم تعفر
سل سيفك وذكر العدى بايام خيبر
يالمرتضى بالطف الك صارت رزيه


لو ادري ماجيت بضعن للغاضريه
تحمل الماي من النهر عندك وصيه

***********
سيد حميد النجفي

و حيدر العذاري

نزله

اه يا يوم النهر + زند عباس انبتر
1
اه يا حر الظمه
الاخوه كله مخذمه
والاطفال ميتمه
ومنه مامش كل خبر
اه يا يوم النهر

2
سكنه ظلت بالعطش
والعدو بينه بطش
يلي اسمك علعرش
كلي جا وين الكمر
اه يا يوم النهر

3
كله الهلال انخسف
والوضع ماينوصف
واحد وسبعين الف
كله تهجم علخدر
اه يا يوم النهر

4
كال العضيد انوله
يلي جنتي مدلله
والسبي هذه اوله
وما الج غير الصبر
اه يا يوم النهر

5
عباس ضربوا هامته
مخه غطه كصته
يسرته يم يمنته
وسهم طفاله النظر
اه يا يوم النهر

6
راسه مضروب بعمد
وجفنج يظل بالسهد
روحي جيبيلي الولد
وخلنه نمشي بهلسفر
اه يا يوم النهر

7
اخذ للطفل ومشه
اجه بنبله مخندشه
بصمه ظلت بالحشه
لحرمله طول العمر
اه يا يوم العمر

8
لابن امي قبلت
نحر منه وشبكت
للامانه رجعت
وبيدي قدمت المهر
اه يا يوم النهر

9
عله التله امن وكفت
لابن امي وظللت
منه ما صوت اسمعت
بس يون ويحتضر
اه يا يوم النهر

10
السهم وسط الكلب
راسه بالصخر انضرب
شيبه بالدم اختضب
ولن يجي يمه الشمر
اه يا يوم النهر

11
كعد فوك اعله الصدر
كطع منعنده النحر
والدمه كتت مطر
وشاب راسي من القهر
اه يا يوم النهر

12
تالي راسه اعله الرمح
من طلعنه اويه الصبح
عليله ظل بلا جنح
ميطير فرناس الصكر
اه يا يوم النهر