نزله

ياعلي ناداك بلساني العلم + كوم ردني للوطن ولدك خذم



يا ابو السبطين يا حامي الحمه
شبت النيران شوف مخيمه
والسمه بهل يوم لن تمطر دمه
جيف لن بحسين من طاح السهم


ياعلي ظليت عكبه محيره
نايم ابن امي الشمس متوجره
هجت الايتام ما واحد دره
تاهت بوديان اطفال وحرم


كمر هاشم علنهر راعي الجود
واعد سكينه بوعد من الوعود
لا بكتله العين لا ظلت زنود
بس ينازع علوطيه من الولم


جيب ذو الفقار واحرس خيمتي
من اجيت الكربله ويه اخوتي
ما حسبت حساب هذي بحسبتي
اوكع يسيره بدين اهل الظلم

بويه وشلون الحرم يتيسرن
مايصير اجناب وعليهم بدن
والسياط شلون بينه طوحن
ترضه نبقه ابين فرهود وشتم

بناتك البستر جانن والدلال
يعدن ابين الخيم واهل الضلال
مابكتله ايمين ابنك لا شمال
علنهر والعين طفاهه السهم

تدري ياكرار بحسين شجره
شوف المثلث اشسوه بخاصره
وشاهد اضلوعه الصفت متكسره
والنحر مكطوع كلشي ما سلم

اه وا ويلاه وين الوالي + راسه يلعب بالعمد يبرالي
1-
اه وا ويلاه من حال الحرم
لا ولي عده او لا ظلت خيم
ولن جفيلي عينه طفاهه السهم
وسهم بالجربه وعطش باطفالي
------
2-
عطش باطفالي الخيم متلاهبه
عافت خيامي الزلم اهل الابه
والنحور اعله الارض متربه
والسياط بيمنتي وبشمالي
---------
3-
شمالي ريت انكطعت وياهه اليمين
ولا اشوف اعله الرمح راس الحسين
من ارد شلون اللاكي ام البنين
وشرد اسولف اله عن احوالي
--------
4-
احوالي هذي ميسره عكب الخدر
جف جفيلي انكطع شابك لنهر
سبل ابن حيدر حضن نحر البدر
ونشب من كوسه ولم دلالي
-------
5-
ولم ما يهده ولا يقبل يهيد
من اشوف بن امي مرفوع بحديد
اه طبت جدمي بمجلس يزيد
ريت مني تكطعت اوصالي
-------
6-
ريت اوصالي غدت متكطعه
والبيابي مني تذرف دامعه
ولا تشوف الصبح هاي الواسعه
ولا طلع صوتي وظهرله خيالي
-----
7-
خيالي بان اوكع منعندي الستر
بين اجانب كلبي يلفح بالجمر
وانظر لعباس مكطوع النحر
يلوح علميال راسه كبالي
-------
8-
ويلي الخرابه الغدة مزمهره
والسلاسل بالجفوف مزنجره
وهند صبحت لن اميره مخدره
تنشد اعله اهلي وتشوف احبالي
------
9-
احبالي مربوطه وغديت مسلسله
يجرجرونه ابين شام وكربله
والرماح ادور بين العايله
راحت الاخوه اوكع كفالي
-------
10-
راحوا وخروا نجوم اويه الكمر
والجفوف اتكطعت راسه انطبر
اه يدهري واه يعاشور وصفر
وما بكت شمعه اليه تلالي

حيدر العذاري