الطور (محتاره هليله الروح)


تتناغه وتهل بالعين + والمدمع يذرف صوبين
تلوليله وتكله هداي + شويه ويجيبون الماي

1-
يا سلوة حياتي ويا ربيع احلامي وسنيني
يازهره وعطره يفوح يمن عطرك رياحيني
صفيت بلا عطر ياحيف ولن جرده بساتيني
شتكول الفاجده مثلي مثلك يا بعد عيني

بستاني خالي من زهور + عبد الله تالي منحور
يوليدي ارحم لبجاي + شويه ويجيبون الماي

2-
تخليني هرش مكطوع بنوايب عمري مبتليه
يحاجيني المهد ويكول ما مش من بعد جيه
دكلي ليش يوليدي ماتحجي وترد ليه
منو بعدك يناغيني واحضنه او شلي بايديه

شسوي بيدي بعداك + وما اكدر اتناغه وياك
يا مهجة كلبي ورجواي + شويه ويجيبون الماي

3-
دليلو يلولد يبني ... ما تنكال بلساني
عكبك يبني يا مدلول وحيده الوكت خلاني
تفز عيني على صوتك بكل ليله تواسيني
واخاف تكدرك نسمه من تاذيك تاذيني

وعيوني ماترضه تنام + شلون تنام وبيه سهام
مو نزفت من عيني دماي + شويه ويجيبون الماي

4-
هناك وطلعت ثديه تريد ترضعه وتشمه
ادري من العطش ذابل واسمعه يصيحلي يمه
اشوفه ابني يتحرك يداعب روحي ابسمه
لجن لمن اكرب اعليه ما اسمع ولا جلمه

در ثديك يا بعد الروح + تتبسم وانته مذبوح
تتبسم وتفرح جلاي + شويه ويجيبون الماي

5-
عهد من دمعي انطيلك يعبد الله فلا انسه
ما يخمد لهيب الروح شما مر صبح لو مسه
حر الشمس صنوي يصير اخطن صورتي بشمسه
ولو نامت عيون الناس عيني بيك متونسه

انه وشمسي صرنه اثنين + بس حول ويمك ماشين
يجفنوني وتخلص بلواي + شويه ويجيبون الماي

6-
اريد الموت يلفيني انا ما ريد العمر بعدك
دخذني خل اطب وياك واتوسد وسط لحدك
وانام وانته يمي تنام واغطي جفني بجفنك
واذا يوم القيامه يقوم وانته مخضب بدمك

نوكف نسمع شيكولون + وتصد لحيدر العيون
نكله تقبل انته بهاي + شويه ويجيبون الماي

7-
يصد حيدر على نحرك ولو شافك يشب بنار
وعنده فاطمه تحضر ... ويشاهد اثر بسمار
وينظر للظلع ويشوف منحر من ابو الاحرار
بس لو يدري يوليدي بزينب اشجره وشصار

من ينظر ويشوف ظلوع + بسمار وراس المكطوع
وبزينب جا شنهي الراي + شويه ويجيبون الماي

حيدر العذاري