بالله يا ميمون شنهي الحاله + جينه ننشد علذي من شاله

1
شاله ياميمون ياهو ونزله
بالقرح كافور لو ماغسله
واللحد هم عرضه يو بلله
والرضيع اعله الصدر خلاله

_______

2
كلي ياميمون وصف للوضع
خل نفطر جبودنه نهل الدمع
خلي هذه الكون وضعه ينصدع
وخل تطيح شداده اعله جباله

_______
3
خل تهدم شداده متكسره
عكب طاح حسين اخته محيره
واضحت بنات النبي متيسره
لا ولي عدهه الذي يبراله

_______
4
لا ولي باجي ويرجبه الهزل
غدت بت حيدر تدور اعله النفل
الجري شو جنه انكلب خشني وبطل
وين الي دك الصدر كفاله
_______
5
هو اللي دك الرجل كال اكتفل
لا تهابين العده وعوفي الوجل
انه ابن حيدر علي ذاك البطل
هذي شفره بيمنتي عساله
_______
6
شفره جايه من المدينه محضره
صكت اعليه الدمه بالكنطره
انه الاول دومي والوادم وره
ومايتيه الرسن من خياله
________
7
ما يتيه الرسن والمهره تحدي
انه اعج عجت عجيجة والدي
عمت عينه الذي ميشوف الجدي
اعمه سار بيمنته وبشماله
_________
8
يمنته ماظلت ولا ظل شمال
والعمد طر هامته وعاف العيال
بالظمه تالي الحرم وين الاطفال
صفت بالوديان عكب ضلاله
_________
9
راحت ضلاله وصفيت بلا خدر
معفر ابن امي وضلع منه انكسر
نايم القاسم و الاكبر منطبر
وحتى عبد الله انفطم بنباله
_________
10
نباله وجغت نار من شرياني
ونشب من كوسه ولم وجداني
يا الهي هاك اخذ قرباني
هذه قرباني وبصم جتاله

_________
11
بصمه خلاه بنبلته حرمله
وطفه عين الكمر مالي بكربله
شخلفت اله حقد ام البله
ذيج ام البغل وام جماله
_________
12
جماله واسياط ورمنلي المتن
والعليل بجامعه ظل ممتحن
عيونه علينه لمن راحن واجن
صرنه نستر بدينه كباله
_________
13
صرنه نستر عكب ذاك الدلال
بالهضم وسياط من الظعن شال
عجت العصرين بينه اعله هلحال
بظهر وغيوم الدمه من مياله
_________
14
يا صميده ميال مطرة بالدمه
جلجلت للكون شافت فاطمه
حضرة لكربله بجبدة مخذمه
بيابي شبحت للظعن واطفاله
________
15
للظعن شبحت وسالت للدمع
جم ملك وياه حاضر منفجع
جنه طه اليوم حاضر بالجمع
والرسل كله بدمع هماله
_______
16
ياعلي الانسين تهمل واجده
والاجساد اعله الثره متوسده
ثلث تيام شجره عليه وسده
جينه ننشد عن ولم حماله

حيدر العذاري