رساله الى كل غريب من غريب

وزن يحسين بضمايرنه



حب حسين موطنه + بيوم الحشر يجمعنه
حب بلا حزب واتباع + سلب ونهب لو اطماع

بكل بقعه الوطن عدنه + حب حسين موطنه
*****
الناس بكل عصر تنهج منهج بيه رغبته
وحده تريد سمعه ومال اوحده تريد زينته
اوحده ادور اعله الجاه كشخه ونفخه طلبته
اوحده المنصب يغره تفجر الناس غايته
اوحده السلب عاميه حتى الكعبه سلبته
اوحده تمشكل الوادم والف طلابه لبسته
اوحده تفجر بورقه ودنيه بسحت باعته
دنيانه العب بيه وصار الفلك دورته
بس الحبة الكرار تظل دومك مصيبته
تبذلك ذهب والماس يحسين انته دنيته

تظل انته الشرع والدين + عنوان الشرف يحسين
وشما الزمن طشرنه + حب حسين موطنه
*****
اخبرك سيدي باوضاع امتك والجره عليه
كلشي صفه اعله المكلوب سافله اعله عاليه
ارامل واليتامه اشكال وما رحمه الخلك بيه
صار المنكر بكل بيت وهلعله شيداويه
امـتـك عافت القران صلخ وذبح تاليه
ردت تعبد الاوثان ثوب الطمع غاشيه
وجاهل بالعلم والدين لو تسائل يدليه
راح الزهد والاخلاص وحاميه حراميه
واحنه بيك امنه وكله تضدنه خليه
اليعشك ما يهمه الموت والدنيه وبلاويه

شما يجري ويصير يصير + حبك كل طفل وجبير
وبحبك توسمنه + حب حسين موطنه
*****
افكار البشر يحسين كل واحد وتجديده
واحد فكرته الاموال خساره وربح تحديده
اواحد فكرته الاعمار تطوير البلد بيده
كل واحد واسلوبه وتوفيقه وتسديده
بس انته وحيد الكون الفكره منك جديده
ما واحد تبناهه وقدم بعدك اوليده
هلموقف يبهت الناس محد يكدر يعيده
كل افكار هذه الكون تعجز يم دمه وريده
عبد الله انفطم بيدك وسهم مشكل بجيده
شما صار ويصير انوب عنك سالفه بعيده

عجزت الالف والياء + وبحور الشعر والراء
صحنه بيك امنه +حب حسين موطنه
*****
ارباب الدغش والمال على حبكم يحزدونه
والماعرفة الاسلام يكفرونه ويفجرونه
واللي خرجت من الدين على حبك يذبحونه
كطع روس وخطف يحسين والرافضه يسمونه
كــلـما تنفجر عبوات نتكطع يشوفونه
سنتهم ذبــح صــارت نيتهم يمنعونه
وهم نرجع نرد اردود يم بابك يلاكونه
الحبك ما تهمه اخطار والوادم يعرفونه
حبك بينه من الساس شما رادوا يكرهونه
صحنه بيــــك امنه نردده يسمعونه

نلطم علصدر والراس + نذكر زينب وعباس
حبك وي نبظ دمنه + حب حسين موطنه
******
نعرف سيدي لحبنه اعدائك تشب بنار
واليعشك ولف يا ناس متهمه ابد الاخطار
بس وده يود محبوب ويزوره ويرد للدار
دربك يشهد علينه شكد منعتنه بي الاشرار
من السبعه والسبعين وليومك علينه شصار
جيشوه علينه جيوش ارهاب وذبح واخطار
بس ما همنه كل هذا نبقه اعله العهد زوار
انطينه ارواحنه بدربك ونبقه انعاود المشوار
هنياله الي مات هناك واطرافه غدة طشار
مانكدر على فراكك جيف انته ابو الاحرار

اسمك بالرحم شفناه + ومن اكبرنه اتعلمناه
حبك هو نطفتنه + حب حسين موطنه

حيدر العذاري