كوم وردني .. يم الزهره

ياخويه ويا جافل خدري
اذكر بيامي وكل عمري
انته حزامي وشدت ظهري
ليش لظهري اليوم تكسره

كوم وردني .. يم الزهره

عباس باسمك اتنومس
من الليل عليه يعسعس
من احجي ولمن اتنفس
يلجنت تناديني يالحره

كوم وردني .. يم الزهره

ليش من اندب متحاجيني
السهم بعينك صايب عيني
وجفوفك كطعت جفيني
والهامه مني منطبره

كوم وردني .. يم الزهره

كوم وركبني اعله المحمل
خويه خلافك صرت اتامل
لا اشوفك لا صوت اليوصل
ولا والي اطفالي مطشره

كوم وردني .. يم الزهره

شيهيد سكينه ولوعته
اعله الاكبر خويه ونته
ورمله اعله القاسم حنته
والترضع تنحب منفجره

كوم وردني .. يم الزهره

ردت للعود ومهمومه
اولادك ما ظن بيهم كومه
يلسلمانك تحضر يومه
تكله تخليني بهل صحره

حيدر العذاري