نزله
اجرك الله يلولي بالحسين ومصابه + مذبوح عودك علترب جينه نهيل اترابه
1-
بني اسد عمه الحزن
والتمت بطف المحن
جايتهم تريد الدفن
لحسين ويه اصحابه
2-
وكفت وتنظر للجمع
مهمومه وتهل الدمع
وتحيرة بهذه الوضع
ماتدري شنهي اسبابه
3-
وهناك اجه ابن المرتضى
يلهب كليبه من اللضه
ميلمه كل هذه الفضه
انسدت اعليه ابوابه
4-
يم عوده هل بدمعته
والنوح هاج بونته
زاح الترب عن حفرته
نزله وهاج صوابه
5-
لن سمع صوت من النحر
حطلي الرضيع اعله الصدر
يابويه يا بعد العمر
وحط خده فوك خضابه
6-
كال الهواشم تندفن
بالحفره هذي وظل يون
والدمع فاض من الجفن
سال بجمر عطابه
7-
كال بحبيب بهل الكتر
ينفرد وحده بهل الكبر
رحبت بيه ام الخدر
وبراسه لف عصابه
8-
والاكبر بفيض من الدمه
وجاسم جروحه مخذمه
وبعينه ينظر للسمه
من دفن كل احبابه
9-
الانصار خلاهم سوه
والجبد منعنده انجوه
ما واحد البيه ارتوه
والماي محد جابه
10-
وتعنه صوب المشرعه
النهر صار بمدمعه
يعاين جفوف مكطعه
دموعه غدة سجابه
11-
يكله يسلطان النهر
سكينه ظلت تنتظر
يا وسفه جفك ينبتر
وسهمك يصيب بيابه
12-
عمي يحماي الظعن
زينب خلافك بالوسن
دولاب فر بينه الزمن
وشاخة علينه اذنابه

حيدر العذاري