من دنه العسكر عليه + حست بساعة خطر
كامت وعتله صعدت + شبحت لصوب النهر

شبحت لصوب الولي
تكله وينك يا علي
نومه اضحت كل هلي
وانهتك منعدنه الستر

كوم واكصد خيمتي
نومه بالحومه اخوتي
ياهو يجمع عيلتي
شلون لو حل العصر

ردت لصوب الكفيل
تكله ماظل عندي حيل
وما بكه غير العليل
كوم ليه يا كمر

وياك اجيت من الوطن
عيني ظلت بالوسن
كوم لململي الظعن
واكطع لسان الشمر

ايست محد لفه
وصوت الحسين اختفه
اجه الشمر بمرهفه
اندارة بعبره وصبر

تكله عوفه لهل الحرم
بيك لو جانت شيم
جاوب بزجر وشتم
ولنه يكعد علصدر

اخذ راسه بيسرته
وحز ركبته بيمنته
بويه لمن شافته
ودعت ايام الخدر

تسيل منعنده الدمه
وينه يوم المرحمه
ال اميه بمغنمه
وضلع الحسين انكسر

ولن تشوفه اعله الرمح
ولا ولي عده يصح
واظلمت وكت الصبح
ودمه ينزل بالمطر


حيدر العذاري