حبيبي + يابعد العمر وايامه وسنينه
حبيبي + يا عطر النبي وبذرة رياحينه

تذكر من حظنتك + تلعب يمي شفتك
تاليه بهجر والبعد ظلينه
__

1-
كعد يمه ويكله الروح بجفاك يعت بيه صبره
وانته بالكبر ما تسمع الصوت وحيرني امره
عفر شيبته بلترب ويكول هلدنيه شدهره
حبيبك جابر يناديك بعتاب مترد لخبره

عشكنه + عشكنه نسيته لو الاوداج مكطوعه
عشكنه + عشكنه للابد بالونه واللوعه

خلاني زماني + لجوابك اتاني
اتاني والوكت شندخ سجاجينه
تاليه بهجر والبعد ظلينه
__
2-
لن جاه الخبر عن ظعن الحسين كرب من نزله
زينب كربت بالهم والالام وما يدري شيكله
عكب ذاك الخدر وبحمه الوليان وعباس الكفله
اجتي من اليسر من ديرة الشام جعدة يم اهله

شيكله + شيكله والدمع كطع بانفاسه
شيكله + شيكله حسين نام بكتر عباسه

بالعبره الخفيه + بارض الغاضريه
اجتي من السبي ويمك تلاكينه
تاليه بهجر والبعد ظلينه
__
3-
كعدت علكبر وتكله يحسين دولبني زماني
عتله انادي بدمعة العين ياحيدر اجوني
راسك علرمح من شفته مرفوع خابت كل ظنوني
سدرت وشف بالخيم نيران وعدوانك ولوني

ولوني + ولوني والنسه فزعت ومرعوبه
ولوني + ولوني والاطفال مطشره انوبه

ياهو اللي يلمه + ومن يجمع شمله
ويرد العدى ويشمر يمينه
تاليه بهجر والبعد ظلينه
__
4-
جابر بالدمع ينشد السجاد يبن سيد الكونين
كلي بالجره والصار وشلون حاطوا عودك حسين
يكله بالسهم والخيل داسوه رضو جسمه صوبين
واعليه الشمر من نزل السيف خرة دمعة العين

مصيبه + ياجابر مصيبه الوكت سواهه
مصيبه + وعيون الافلاك بدمه اجراهه

وهنانه لكيته + عليه ظهري حنيته
ويريد الطفل علصدر اخلينه
تاليه بهجر والبعد ظلينه
__
5-
ياعمي يجابر هاك الاخبار واسمع بالجرالي
راس حسين بالبلدان يندار كفار احنه تالي
زينب بالمجالس ظلت ادور جي ماعده والي
ذبونه بخرابه بديرة الشام وهذه اللي صفالي

خوارج + تاليه خوارج لن يسمونه
خوارج + محتفلين والوادم يسبونه

طفله بدمع العيون + كعدة ابن ميسون
ما ظنيت ولراسه يراوينه
تاليه بهجر والبعد ظلينه



حيدر العذاري