الطور

https://www.youtube.com/watch?v=mlzDtnJ7M4U



خويه ليش تنام + جينه من الشام

رديت الك هليوم + وكليبي كله هموم
______
1-
تعنت للنهر والدمعه علصوبين
تكله اليوم اجيتك والدمع بالعين
اذا تذكر وصيتين وعهد بثنين
وحده لعودنه الوصاك من عقدين
اوصيت امك من ودعت الحسين
خدر اختك تكول تحرسه بالجفنين

والجفن مصيوب + والخدر مسلوب
وانه بعتب وبلوم + وكليبي كله هموم
_______
2-
اجيت من اليسر بالونه والحسره
اعت بصبري وكليبي بلهب جمره
اعله عبدالله بنص حول وخلص عمره
وجمره من السبي متلاهبه وحمره
تصل بوجاغي علراس اشبجت عشره
صحت ياويلي من دهري والم هجره

يا دهر غدار + سلبت الصغار
ياخويه ياجيدوم + وكليبي كله هموم
_____
3-
تكله اجعد وسدر بينه للاوطان
اجيت اليوم من ديرة بني سفيان
ولي ماعندي بس واحد غده وجعان
وجسمه من المرض متنوحل وتعبان
امك تنتظرني هناك علبيبان
شكلله اذا تنشدني علخوان

تكلي وين حسين + وتجري دمع العين
شخبره علمظلوم + وكليبي كله هموم
____
4-
اريد ارجع بحماك ويشوفوني
اذا رديت يلغالي يعرفوني
اريدك تنتهض وتشوفك عيوني
انا باسمك هلوادم يسموني
اجيت بجفك وتاليه عفتوني
بين اعداكم وكاموا يضربوني

والشتم الوان + ردنه للاوطان
لاتعتذر بالنوم + وكليبي كله هموم
___
5-
ايست من ابن حيدر يرد بيه
ردت للولي بلجن يواسيه
تكله عضيدك زنوده امبتريه
ما يكدر يردني وعينه طافيه
شتكول بظعنك شبصرك يواليه
تعوفه بلا حمه وعينك تصد ليه

خويه دربي بعيد + والعتب ميفيد
ظلت عليك تحوم + وكليبي كله هموم
____
6-
كامت منه بالعبره وتتحسر
تكله مامش جواب من ابو الاكبر
ترد ظعني للاوطان ياحيدر
تره عباس مخ راسه غده مطشر
تكله نومه عبد الله وبعد جعفر
سبعة شبولك تبتروا يبو شبر

بالغرب ظليت + لا اهل لا بيت
وهذه الظعن مزكوم + وكليبي كله هموم
____

حيدر العذاري





لو سالك احدهم

ابناء الامام علي في الطف وهم الحسن (ع) وامه فاطمه (ع)
والعباس واخوته عبد الله وجعفر وعثمان وامهم ام البنين (ع)
ومحمد الاصغر (ع) وامه اسماء بنت عميس
وابو بكر (ع) وامه ليلى الدارميه

ذكرهم ابو الفرج الاصفهاني في كتابه مقاتل الطالبيين
ورثاهم سليمان بن قته حيث قال


ستة كلهم لصلب علـي + قد أصيبوا، وسبعة لعقيل
اي ستة من صلب علي بالاضافه الى الحسين (ع) فيكون العدد سبعه