ردت زينب للوليان + بدموع وهم واحزان

1-
نوخت يم حسين تكله
نومتكم خلتني بعله
فتك اختك ياهو اللي يشله
وكلي شلون بهل النسوان
2-
يشل فتكي يرجبني الوالي
صار اوجاغ بنص دلالي
كوم اوديني لكفالي
وهو يخمدلي النيران
3-
وجاغك وجر تلهب ناره
يمين العباس ويه ايساره
غدرني وطاحن بالغاره
وخلني ابين العدوان
4-
عدوانك خويه يحاجوني
ومامش خوان يحاموني
يتبختر كدام عيوني
والكاس بجفه وسكران
5-
الكاس بجفه ويهدينه
ويشمت من يحاجينه
كوم وعاين حال سكينه
ذبلة منعده الاجفان
6-
كوم وعاين حال عيالك
وشلهلي يمينك وشمالك
وخل تشوفك كل اطفالك
وتبرد نار الوجعان
7-
مو صعبه عليك تبرده
يلعودك للشمس يرده
فتنة خيبر من خمده
وذي الفقار بجفمن جان
8-
يا جف اتلكه ويلكاني
وبالحومه نامت خواني
عباس بوحدي خلاني
وشلون انرد للاوطان
9-
شلون انرد ويامن ارجع
ولو نوصل منهيه التطلع
ومن تنشد مني شتتوقع
شنهو جوابي اعله الخوان
10-
بيش انجاوب من زوارك
تلفي وتسال عن اخبارك
شنكلهم مترد الدارك
نايم بالطف علتربان

حيدر العذاري