طور حمزه الصغير (اه ياليل)


يا مظلوم ++ بينه هموم
جينه نزورك بلهفه
يفجرونه ++ يذبحونه
يعله الصوت مايخفه
جينه نزورك بلهفه
1

نذكر بالزغر يحسين ++ نتعنه اعله رجلينه
نمشي بياده لعتابك ++ نريد امراد تنطينه
ابو ماجد يلطمنه ++ بكتابك اسامينه
نطيح بمنحرك يحسين ++ ونذكر طيحة سكينه

من طاحت ++ من ناحت
جمر اليسر ما يطفه
جينه نزورك بلهفه
2

نسمع من خبر اثار ++ عن زيارتك يحسين
منعونه يبو اليمه ++ وببعادك تصب العين
مية ذهب طلبوهه ++ وبعده طلبو الجفين
انطينه جفوفنه وجينه ++ العام الثاني علرجلين

انطينه زنود ++ والمكصود
رسم زيارته جفه
جينه نزورك بلهفه
3
يبو السجاد عشنه دهور ++ بيه زيارتك صعبه
بيت الله يحجوله ++ محد يوكف بدربه
بس دربك يبو الاكبر ++ ثمن حجه كطع ركبه
صحنه بيك امنه ++ نردده على العتبه

جينه ليك ++ يا لبيك
اليحب يتوطن لحتفه
جينه نزورك بلهفه

4

تريد تحج يبو اليمه + يلحجتك بالف حجه
الكعبه طافت بكبرك + وعندك اجت تترجه
يسعى الصفه والمروه + والجمر اله الف وجه
محرملك اجه القران + غمج بالسبل غمجه

والايات + والرايات
كله تلوح مختلفه
اجينه نزورك بلهفه
5

يا مالك عروش الكون ++ يلأ نته سفينة نوح
هاي ارواح الك حجت ++ لو انته اسكنت بالروح
النواصب تذبح الزارك ++ والشيعه تجي وتروح
ما همه كطع ركبه ++ لا همه الم وجروح

ولو يردون ++ ننطي عيون
و بعده البشر ما وفه
جينه نزورك بلهفه

6

يا دم العقيده السال + على تربة جوامعنه
انته كعبة الشيعه + والك شارت اصابعنه
المنابر ركزت حبك + ترن بسمك مسامعنه
ماتم الك وسط الروح + على الونه تطبعنه
طبع بينه ++ يربينه
اليحبك عينه ما تغفه
اجينه انزورك بلهفه

حيدر العذاري

والله اللي يحب الحسين عينه متنام لان الدمع يطير النعاس