بوري المرجعيه على الاحوط وجوباً

- اقرأ المزيد : http://www.qanon302.net/in-focus/2014/08/22/29559




فرحان العراقي عود هم احنه مثل الوادم والناس صارت عدنه انتخابات مكرم السامع بس شني من انتخابات شرط عالسجين, وعلى حظنه الطافر العاني كَمز النه بيه شعيط ومعيط وجرار الخيط وصارت القاده اكثر من الشعب , مرات الواحد كَلبه ايسولف وياه , بس مو كلشي ينحجي, وهم نخاف على اهلنه وبناتنه , وكوكه خادمتكم بعده شابه يافعه ولو خلقته مكَلوبه مثل ابوهه ويمكن اتشلغم على كَلبي بس هم محسوبه آنسه وينخاف عليه ,والا هو العمر شباقي بيه, شو كَضه كله دفرات وشلعان كَلب, والله بلانه بناس لا ذمه ولا رصيد اخلاقي, وكلهم علاسه والدرب ابعيد, وعلى ابو انصار المذهب ويطكَونك بالدهن الحر ,وياهو اليحجي ايعلسونه حباً بآل البيت ع من السيد صدر فتوة جهاد كفائي نغزني كَلبي, وكَلت اول تالي…. هو شنو الصار, اكثر من الفين وسته وسبعه شو صارت بالنعل حشا السامع والروس كَمنه نحسب بيه بالشوارع والمفخخات صلوات اتكَول تنوير راس السنه,والسيد جان ساكت وضربو النجف والسيد ساكت و فجرو العسكري والسيد ساكت , وحركَو الثوره على روس اهله والسيد ساكت , والعالم داخ بسكتهه, وكل مره يطلع بالتلفزيون يقره بكتاب, هسه لو نعرف شنو يقره هم نرتاح بس الصدكَ الشباب بدت تطوع للجيش قبل الفتوى اذا تذكرون, بس وره الفتوى صارت هواي ناس وكلمن اخذله ردحه كدام الكامره على الهوبزه وراح لاهله وبس الزلم الخشنه واهل الغيره راحت للجبهه , اني كَلبي كَلي , وماذكر يوم جذب عليه , لان كَلبي فقير وماعده دغش ,, يمكن هذه السالفه مال ولد المراجع الزغار طبخوهه بيناتهم حتى ايكَولون للمالكي تره نكَدر نكَلب الشارع عليك باي وكت, ولو صارت بيه دعم للحكومه, لاجن السالفه مو خاليه كَبل هاي السالفه هواي سياسيين رادو ايزورون السيد ماقبل وباسو الكَاع حتى يلتقي بيهم هم ماقبل , وعلى ابو معلينه وماندّخل ونوكَف على رصيف واحد من الجميع …شو وره هاي الفتوى صار الحجي , كَابله وبزه بعينه , وبعد ماكو ترميش و لا ترميز , ولا حسجه, وصارت المقبوليه والاجماع الوطني مالات عمار الي يلوج بيهن ليل ونهار!!!! هنه شعار المرجعيه……. شلون ماندري !!! كَبل من جنت اروح يم صاحبي بالنجف , ويسولفلي على المراجع وسوالف ولدهم بالنجف , ادوخ واظل افر بذاني …. ايكَلي عمي السيد محد ايشوفه وكل الشغل يم المكتب, يعني يم سيد محمد رضا دامت بركاته , بس بهاي الاخيره ايكَولون السيد على ساس بيده كاتب ” ضرورة تبديل رئيس الوزراء”!!!, جا احنه ابخت جدك , عليمن انتخبنه , وعليمن تذبحنه , وعليمن تصخمنه , وانت بنفسك كَلت لازم ننتخب وصوتنه ذهب .. وحرام الي ايبيع صوته .. اشو تاليه انتم بعتو اصواتنه وخليتونه خرسان خوب مقامكم العالي وباقي المراجع اختارو الحكومه المقبوله الهياً وعربياً وعالمياً ووطنياً وفضوها وهم توفرون افليسات للدوله , وتخلصونه من شلعان الكَلب ,ماطول النتيجه اول وتالي بديكم وبوصاياكم الجليله وسووه فتوى سياسيه تفصال لكل حكومه وبرلمان على المكلف والاحتياط والمطوع اختيار الاصلع والا قصر والافضل لقيادة الخرفان المعدان على الاحوط وجوباَ



-----------

نعيد نقل الكفر فناقله ليس بكافر


فقد يحذف بعد ايام ويدعي بعضهم ان هذا كذب



فليشهد المنصفون شهادة امام الله

من يوافقني على ان هذا هو لب الموضوع؟