يعني اني ادري بعض الاشعار هذه خريط وتسفط حجي بس شسوي المهم شي على شي يمكن اطلع من بينهن ابفد شي

يعني كسر بجمع راح اعصره للقصة واطلع لي منهن فد جم بيت حلو وتصير قصيدة يعني امرتبة شوية افضل من الخريط الموجود

بس السالفة ينراد لها شوية صبر

ولك علس اليوم اعلسنك
و ابتوثية الزمك واكومنك

وبعدها ابوري حيل اطكنك
هيج اليوم اتموت اموتنك

وعجن بيدي اكضك واعجننك
ولك اليوم اكشمك و صلخ اصلخنك

وين تشريد حمس اليوم احمسنك
ولك وتمرعد بعدها امرعدنك

طبن ولك اليوم اطبننك
وبعدها حكن احكننك

وين تطير خبز اليوم اخبزنك
ولك ثليثية و بيها اعكطنك

ولك اليوم ابكيبل جلد اجلدنك
ولك دوف اليوم ادوفنك

وهم خبش بيدي اخبشنك
ولك تكرمع اليوم اكرمعنك

نتف اليوم ولك انتفنك
وسلك هيج الزمك واسلكنك

اتحطم اليوم احطمنك
ودمار هيج ادمرنك

ولك ثرم بيدي اليوم اثرمنك
وهم تمزق امزقنك

بعدها ما خلصت

ومعاني كل هذه الكلمات باللهجة العراقية يعني اضربك او ابسطك

من تشوف بنية حلوة وتعجبك بس تنطيك بلوك :d:d:d

تريثي يا حلوة ولا تضربيني بلوك
غير حن كلبي وارتفع عندي الشوك
—————
كلش حبيتج واريد احطج بنص كلبي
يومية تدللي علية وكلشي مني اطلبي
—————
ما اكلج اطبخي بامية وسويلي ثريد
ولاغسل مواعين ولاحتى تنظيف اريد
—————
اريدج بس تفهمين شي واحد يالغبية
ترى اني حباب وماكو اي مشكلة بية
—————
لا اسكر لا اكبسل ترى خوش وليد اني
اصلي واصوم واحب الله اللي هداني
—————
ما اكلج انتي ثولة يا ام عقلين ياعوبة
غير كلبي الاغبر اللي لعب بي طوبة
—————
اريد افكه بدرنفيس وسبانة والنكي
واشد له وايفاي واكلج تعالي كنكي

بقلم النابغة ابو العتاهية المعري

ما هذا الجمال الذي يختبى وراك
قد صرت اذوب كل يوم في هواك

تعرف جيدا بحبي وعشقي فيك
لكنك متكبر و تحبني ذليلا اتيك

كفاك ان تحط من ولهي وجنوني
فبسببك تدمرت من البكاء عيوني

مالذي تريده بالضبط ايها الاحمق
فارس الاحلام ام رجل غني اخرق

ام سعادتنا التي اعدك انها ستدوم
وحبنا الذي ليس له حد الا النجوم

اهي كل ليلة تجد فيها قلبك مهموم
ام يدك على قلبي لتعلم اني مظلوم

وانك كنت سبب في كل تلك الألام
التي مررت بها لكنها صارت احلام

احلام حلوة بمجرد وجودك معي
لعلك تعرف عن هذا الحب وتعي

لا باس ان كنت لا تريد السعادة
فانا لا املك اهديك حتى قلادة

فقير مثلي لن يعطيك سوى قلب
قلب ابيض يملك فيه وفاء الكلب

لمن يسال ما سبب كل هل الخريط
والخرابيط او هذا مجرد تسفيط
ليس كلمات شعر او كلمات ادبية

يا اخي لا تقرا واذا قريت وضحكت
استمتع

اي سالت منين هل السمرة
حلوة وشعلت بگلبي جمرة

اريد استوعب بس حلاتها
جنها اميرة يا حسن صفاتها

عيونها تكتل وتدمر گلوب
والوجه يجنن شكله محبوب

كبسول عشق اريد اشربج
حتى تندلين وين دربج

هناك يم گلبي تروحين
رجل على رجل و تامرين

اي شي مني تطلبين اسويه
عبد يمج حتى كلبي ارويه

بعشكج اسگيه حتى ينبض
يستقبل منج حب ما يرفض

يا ناس اريد اسولف بيها
وبحظني اخليها واباريها

وشتطلب مني عد عيناها
بس تگول واني عد يمناها

احبج ياسمرة يا ام عيون
تخبل خلتني بيهن مجنون

يا حلوة افرح من يمر خيالج
خليني يا بنية دوم على بالج

اريد يم بيتكم افتح لي جمبر
ومن تمرين اشم عطرج العمبر

نسمة هوة منج ترد لي روحي
واذا بي الم تداوي كل جروحي

ياحليوة انتي عطرج عطر عود
وعشكج بالگلب نابت و موجود

انتي ام گلب الطيب الحنونة
واني وي الحلوة اتعامل بمرونة

حباب وطيب مو خاين ولا غدار
كتوم وتعرفيني ما اهتك اسرار

فهميني كلبج شوكت يحن عليه
ادري اسكر واشك راسي بقوطية

شسوي فهميني دربي ما اندله
كافي ترى والله عيب هل الذلة

احبج واريدج حيل كلش كلش
ادري الزم كلبي وافلشه تفلش

انتي الورد والعطر والريحان
انتي الفاتنة التي كلها حنان

انتي صاحبة الادب والخير
بيضاء القلب نقية كالطير

ايها الحلوة كانك زهر اقحوان
جمال روحك يشعرني بالامان

شفاهك الرائعة تقطر عسلا
جعلتني اكتب من اجلها غزلا

وعيونك ايتها الحسناء براقة
طلتها جميلة و لها إشراقة

يا حلوتي كان القمر يشبهك
او انتي احلى منه في وصفك

اخبريني بسر جمالك يا فتاة
اعشق فيك كثير من السمات

اعشق تلك الايادي البيضاء
فانت تلك الفاتنة الحسناء

اعلم انك تاتين الى هنا بين الحين والاخر
وربما تقرين هذه الخرابيط التي ارتبها
لكن قلبك القاسي لا اعرف ان كان حجارة
او جليد يرفض ولم يكن يوما ليقول اقبلي
انتي لاتعرفين الحب ولا تعرفين الزمن المتقلب
ولا تعرفين ماذا يعني ان يهتم بك شخص
يحاول ان يسعدك ويجعل منك انسانة
انه قلبي الاخرق الذي ابى كل الجميلات
وقبل بك

قبل ان يتعذب وقبل ان يتالم فقط حتى تكونين
انتي فيه انتي فقط مالذي اصابه ومالذي دهاه
ان امره عجيب اخبره ماذا بك يا رجل يردد في
اذني ويقول هي ليست حسناء وربما ليست
الافضل من بين النساء لكني معها اشعر بالراحة
​​​​​​ واشعر بوجودي واشعر باني انسان حقيقي
واشعر بالسعادة فرحتها تعني حياتي ابتسامتها
تعني لي النسيم العذب

لا باس لكن هناك قلب يتالم ودموع تجري
اسال الله ان لاترى مثل هذه الحالات ابدا
ودعائي لك بكل خير وسلامة وصحة وعافية
يا عديمة الشفقة والرأفة

ايتها الحلوة الجميلة البيضاء
كان وجهك ليلة ناصعة قمراء

وحبك في القلب يطرب غرام
هو العشق الذي قيل عنه حرام

قد صرت اراك حتى في الاحلام
وهذا يا حلوتي يسمونه الهيام

ستمر بنا السنين وستمر الايام
اقبليني واسمعي حلو الكلام

ارجوك لا تتركيني فيك اتوسل
لست بائع ورد ولا حتى متسول

انظر اليك والدموع مني تنهمل
وجروح قلبي بعدها لم تندمل

اخبريني كيف حبي لك ابرهن
فقربك مني هو حقا لي وطن

صرت بدموعي كل ليلة اسبح
وابتسامة على وجهك بها افرح

اقسم ان قلبي لازال اليك يحن
ولست سوى الخير فيك اظن

ضيم انتي هم جذابة وهم حبابة
ادري شلون ازحف عليج بدبابة

ايه شفت وجهج مثل گمر يخبل
يا ناس صرت زاحف واريد اگبل

لابسة احمر يا ام وجه حلو يلالي
شكيتي گلبي وما طلعتي من بالي

والشال بصلي عبالك صاير طوك
والتليفون گڤره احمر شايلته فوك

والوجنات تجنن عبالك گيمر عرب
والابتسامة خلت گلبي طك وخرب

وجهج يضوي جنه كلوب بالسمة
خلة گلبي من نفسه جمر وحمة

كله سلفيات امبين بالدنيا مسرورة
اعرف بيج تخبلين واعرفج مغرورة

اريد اصجمج ها ام عيون السود
واهديلج شيشة ريحة بعطر عود

بنص الگلب مكانج يم عيون حلوة
يهل الخلك بجمالهن ابتليت بلوة

اكول شوية باعي عليه وحسي بي
دشوفيني يالحلوة قابل اني شبية

و انتي كلشي ماكو احسج حجارة
مدري اني ما اعرف اشمر السنارة

حتى خرزة محبة بجيبي هم خليت
وشكد وياج اني توسلت وحجيت

مو بيدي بس افهمني انتي شبيج
تتذكرين يوم بجيت وتوسلت بيج

تتذكرين يوم ذليتيني وطردتيني
تتذكر يوم كتبت لج وراها رديتني

تتذكرين اليوم اللي كلتي ما تتوفق
ترى بيد ربج العظيم كلشي يتحقق

بقلمي

لا جذب كتبتها بالملاحظات وراها نسختها هنا
بس اني كتبتها يعني اذا اريد اصير شاعر عادي
روائي مؤلف كاتب امكانية

كافي بطل ولك لا تكتب الها اشعار
ولكم حيرني حسنها وبقيت محتار

ترى وجهه يجنن عبالك مثل الگمر
ما انام الليل من وراها مخي اندمر

احبها بس هي ماتعرف شي بالغرام
اني اتعذب من وراها كلش يا حرام

سترة بنفسجية والربطة بعد طوخ
والخدود مدري تفاح ما ادري خوخ

سودة عيونها وتلمع جنها النجوم
والشفة حمرة عبالك مثل حلقوم

والله افكر بيها و حتى عيوني تبجي
دمع والم وحزن بس بعدلها تحجي

احبها موت موت كلش حيل هواي
واسمها هيج مطبوع بداخل حشاي

بقلم النابغة والكاتب والباحث والفيلسوف والمفكر
اني

حذاء وجنطة وبنطرون كلهن سود
واكف على الجرف يا حلو الخدود

اصجم بيك بس انت ابد ما تحس
تغلس انت لو شنو لو صاير شرس

كلي بيا طريقة اكدر بيها احاجيك
يعني شلون تريدني اتوسل اجيك

ليش احس كلبك قاسي جنة حجار
تدري بروحي جمر تشب عليك نار

تدري انت تجي بأحلامي و اشوفك
و تدري اتمناك يمي امس جفوفك

بالعظيم الله اعشقك موت وهواي
مو كلت لك قبل انت نابت بحشاي

تذكر من علية سلمت و اختفيت
اذبحها على قبلة وياي ترى انتهيت

اذا كلبك ثلج ترى كلبي حيل رقيق
واذا تكرهني كلي ما احبك يا رفيق

كافي بعد ولك كافي فراك كافي حرام
تتشفى بي انت لو شنو لو هذا انتقام

كلي شلون اجيك مريض حتى تعالجني
واعترف لك بالالم والشعور اليخالجني

لو تحب تشوفني باسعاف وبعيني دمعة
ثق ترى انت بحياتي عبارة عن شمعة

لا تاتي في يوم ما تنسخ هذه الشخابيط
وتقول انظر الى شعر هذا انا لس بشاعر
هذه مجرد ترتيب كلمات ليس شعر وشكرا