إعـــــــلان

**الصحيفةالسجادية** · 24-12-2015, 12:26 PM

قواعد اللغة العربية

القواعد درس صعب شلون جنت انجح ما ادري المهم شي على شي رهمت ونجحت والحمد لله والشكر راح اسولف لكم شوية عن الفعل والفاعل والمعفول به

مثال

فلش حسوني السيارة

فلش فعل ماضي

و حسوني الفاعل اللي فلش السيارة

والسيارة مفعول به يعني صارت في خبر كان

يعني احتمال طالع على السيارة بجاكوج ابو الـــ 25 كيلو ولا برغي صاحي ما امبقي بيها

مثال اخر

ضرب عبوسي الحايط

ضرب فعل ماضي

عبوسي الوكح الفاعل اللي قام بالفعل

الحايط مفعول به

الحياط اكيد ما صار بيه شي المهم

مثال اخير

حطم عبد الحاسبة بين قوسين (الكمبيوتر)

حطم فعل ماضي

و حجي عبد الفاعل

والحاسبة مفعول بها يعني سواها تراب

وخلصنا من درس الفعل والفاعل و المعفعول به

ملاحظة الجاوكج يعني مطرقة بس بالعراق ما نسميها مطريقة نسمي جاوكج

يتبع

**الصحيفةالسجادية** · 25-12-2015, 12:07 PM

الشعب العراقي طاحت على راسة طركاعة

السيد الرئيس القائد صدام حسين ابن صبحة ما خلا واحد ما سوة وياه مشكلة يعني وية دول الجوار و دمر شعبه ايضاً اللي هم احنا المساكين فلا هم رحمونا ولا احنا راحمين نفسنا المهم الرجال اشتعلت روحه واحنا هم راح تطلع اروحنا وبقينا واحد ياكل بالاخر تروح تسوي معاملة تبقى بيها شهرين اللي يعطل المعاملة هو اخوك العراقي يعني بين قوسين الموظف اللي موجود بالدائرة مال الدولة يشلع كلبك جيب جنسية وشهادة جنسية اثنيهن ام الفسفورة وبطاقة سكن وبطاقة تموينية وصور وصحة صدور وتأيد و يستمر الترعبل والمعاملة لو تخلص لو ما تخلص وكما تدين تدان الموظف هم يجي واحد ويعطل اعماله مثل ما يعطل شغل الناس مثل هذولة جانوا يضحكون على نوح (ع) هو هم كلهم (كُلَّمَا مَرَّ عَلَيْهِ مَلَأٌ مِّن قَوْمِهِ سَخِرُوا مِنْهُ ۚ قَالَ إِن تَسْخَرُوا مِنَّا فَإِنَّا نَسْخَرُ مِنكُمْ كَمَا تَسْخَرُونَ) يعني احنا واحد متسلط على الاخر والعراقيين هم واحد يرفع واحد يكبس , هذا رحت طلبت من يمة شغلة بكذا سنة بكذا يوم سالفة مال 7 سنين قبل وهسة جايني يطلب مني حاجة لا خلي يروح ما اسويها الة المهم اشوكت تخلص هاي السالفة من بين الناس ما ادري الله العالم بس انت يا عزيزي لازم تتخذ قرار وتوقف هذه المسالة (وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيمٌ) مو تكعد تتذكر سالفة اكل عليها الدهر وشرب مال عشرين سنة قبل ترى كما تدين تدان وكفها وخلص سوي خير لله ترى هي الدنيا مكظية ما ادري شلون تنكتب (مكظية) هيج لو (مكضية) تعطل شغل الناس هم يجي واحد يتسلط عليك ويعطل شغلك المهم الفكرة وصلت والسلام عليكم ورحمة الله وبركاته

**الصحيفةالسجادية** · 25-12-2015, 12:39 PM

احجي وانطيني الزبدة لا تطولها

العراقي من تحجي وياه انطيه الزبدة وخلص يعني الخلاصة و التفاصيل تاتي لاحقاً والعراقيين اعصاب بسرعة يصير نار

واحتمال يضربك باقرب شي يمة ( نعال - دولكة - كلاس مال مي - ماعون - خاشوكة - الخ )

شعب فاير يكلب كلب ما يفكر بالعواقب ما ادري ليش

فاير يعني يغلي ويكلب كلب يعني يبقبق بين قوسين ماء حار يطلع فقاعات

**حيدرعلي الحسيني** · 25-12-2015, 08:48 PM

مع لطافة الطرح

الا اني اقف بالضد من اللهجات العامية

**الصحيفةالسجادية** · 25-12-2015, 10:05 PM

الحصة التموينية راح تنقرض صار بيها جفاف وهذا الشعب المسكين راح يموت من الجوع والعالم ما عندها فلوس خربان الوضع جداً وما تدري وين جاي تمشي هاي الدنيا والحكومة صايرة ضد الشعب خطية عايشين اللقطة المهم اني سامحت كل الناس اي واحد اذاني وظلمني وهظم حقي كلهم شلع قلع ما بقيت واحدة ما سامحته بس الحكومة العراقية لا عندي ذنوب اهواي عاد اجي يوم القيامة ابراس منو ابذبهن ابراس الحكومة

معادلة بسيطة 1 + 1 = 2

بيت بي 3 نفرات وعدهم حديقة بيها 5 نخلات و 5 برتقالات و 3 زيتونات وشجرة مال تين المسؤل على الحديقة يبيع ويحط الفلوس بالجيب وترك الــــ 3 نفرات كاتلهم الجوع عمي اكعد اعوج احجي عدل حلال حرام مليون % بالمليون حرام
اطمئن اذا ما عندك حسنات ياخذون من سيئاتك ويحطوهن ابراس الحكومة

الحمص راح انقرض من الحصة

وكذلك العدس والفصوليا

والجاي والتايت والصابون تحت ضل الحكومة الحرامية

اه اه

حسبي الله ونعم الوكيل

الملفات المرفقة

**الصحيفةالسجادية** · 25-12-2015, 10:43 PM

كلمات عراقية

توثية تعني هراوة مصنوعة عادة من الخشب

قنفة تعني مقعد يجلس عليه الناس مصنوعة من الخشب

احمسك حمس تعني اشبعك ضرب او ابسطك ويقال احمس اللحم او احمس البصل

ميل تعني ابتعد لهجة يستخدمها بعض اهل الجنوب

جا تعني لعد مثال (جا غير تجيب الشكر قابل نشرب جاي مر)

اطبك على صفحة تعني اوقف السيارة على جانب الطريق وايضاً للشخص يعني قف جانباً

يهف يعني يمشي بسرعة ويقال هفة يعني اضربه مثال ترى اهفك ابراشدي والراشدي يعني الصفع باليد

علبة تعني الرقبة

جطل تعني شوكة او تعني تشغيل السيارة بواسطة سيارة اخرى عبر ربط البطارية بالسلك الكهربائي

سويج تعني مفتاح السيارة وايضاً يقال صار سويج يعني تخربط عقله وصار مجنون

**الصحيفةالسجادية** · 25-12-2015, 11:50 PM

مع لطافة الطرح

الا اني اقف بالضد من اللهجات العامية

طيب لا باس مولاي لا تدخل الموضوع واتركه

**صدى الفكر** · 26-12-2015, 03:46 AM

على راسي حب
احلى موضوع والله
والماعاجبه لا يظل ينك فوق روسنا
ما ناقصين دوخة
سؤال العراقيين المعهود المشهور "شكو ماكو" يعني شنو الاخبار والاوضاع في كل المجالات

**الصحيفةالسجادية** · 26-12-2015, 04:16 AM

هلة عمي ميت الف هلة نورت الصفحة

على طاري التنك نك ترى كلشي ماكو صافية دافية

وهاي جاي وكليجة والف هلة خالي

الملفات المرفقة

**صدى الفكر** · 01-01-2016, 04:25 AM

والله شكل الصينية معدل
يرادلها كعدة مرتبة
اكلك ريالي لو برشلوني؟
هههههههههه

**الصحيفةالسجادية** · 01-01-2016, 07:31 AM

ما اشوف اي طوبة الحمد لله والشكر

راسي مرتاح

**الصحيفةالسجادية** · 10-01-2016, 04:09 AM

محو الأمية

واگف و إجاني رجال چبير بالعمر ، گال بوية ما تقرالي هاي الورقة ، شفتها ، گتله هذا كتاب صحة صدور ، گال زين وهاي ، قريتها ، گتله امر اداري ، گال وهاي ؟ جاوبته ، گام كلساع مطلعلي كتاب وانا اقراه ، من خلص گال عمي انته شدارس ؟ ردت اتشاقه وياه گتله عمي اني أمي ، انت سامع بمعركة بدر ؟ گال اي بوية سامع بيها من الروزخونية ، گتله حجي تدري النبي شرط على الأسرى الكفار كل واحد يعلم عشرة من المسلمين قراءة وكتابة يلله يطلق سراحه ، گال اي ، گتله اني واحد من العشرة اللي درسهم واحد من الكفار ، ربعي التسعة اتعلموا ضليت اني ما تعلمت ، وآخر شيء مل مني ، شاف مابيّ أمل ، أعلن إسلامه حتى يخلص مني ، وگام حتى صلاة الليل يصليها.
گال بوية چا شلون قريت ذني كلهن اذا انت أمي ؟
گتله حجي مو كل من يقرأ ويكتب هو متعلم ، راح اگلك شلون ، هو الينتخب واحد تافه يجيبه من الشارع ويصعده للحكومة والبرلمان ويسلمه بلد گاعد على بحر من نفط و مصانع ومعامل و اسمدة و زراعة وسياحة و عنده ارصدة مجمدة بدول العالم وخلال عشر سنوات يگعّد البلد على بساط المروّة و يخليه مطلوب ، شتگول عليه ؟
گال هذا مطي ، ودار وجهه وراح ، اني اول مرة صدگ ارتاحيت ، بعدين صفنت گلت هذا عليمن يقصد ؟ على اللي انتخب لو على اللي ضيّع البلد؟
صحت عليه حجي انت عليمن تقصد؟
اندار عليّ وگال عمي انت اللي خليت كفار قريش يصلون صلاة الليل وما افتهمت ، تريدني اني المگرود افهمّك ، خلي اروح لا تكفّرني و تخليني أصير من بني قريضة لو بني القينقاع.
هسه هذا شتحچي وياه بلله؟
ومنين يعرف بني قريضة وبني القينقاع؟
-علي السرّاي-

**الصحيفةالسجادية** · 10-01-2016, 04:31 AM

اكو فد سالفة تصير عندي بالمحل مدري ليش تذكرني بالاصلاحات :
(1)
- بيش البيض ؟
- 7 بالف حجي
- ما بيها مجال تزودنة وحدة
- حجي وداعتك دنبيع عالحافة مابيها كل مجال
- يمعود صدك جذب هي وحدة متكلي شصار ، المن رح تلموها متكلي المن .
(2)
- بيش البيض
- 5 بالف حجي
- ما بيها مجال تزودنة وحدة
- اي حجي تدلل ، وهاي 6 وبخدمتك
- الف رحمة على والديك ، شريف ابو علي شريف ، الله يرزقك ويكثر من امثالك .

هاشتاك ‫#‏خرب_انة‬

حسين علي

**الصحيفةالسجادية** · 30-04-2016, 02:48 AM

منقول من مواقع التواصل الاجتماعي

اخذي شاب 💞😌
ينزل وياج للسوگ يجيبلج ع ذوقه ولاتاخذي شاب ينطيج100الف ويخليج تنزلين لوحدج لأنو مو فارغ 💔
اخذي شاب 💞😌
تعيشين وياه ببيت لوغرفة وخلي الحيطان تحجي ع محبتكم ولا تاخذي شاب يكعدج بقصر وتحجين وي الحيطان ...
اخذي شاب💞😌
يكعد يمج ويسهر ع راحتج ذا مرضتي ولاتاخذي شاب يجيبلج عشر دكاترة ويتركج بوحدج لحد مايخلص علاجهم ...😪
اخذي شاب💞😌
يجيبلج وردة ولاتاخذي شاب يدز من المحل لأنو ماعندة وقت يشوف نظرتج للورد 🤗
اخذي شاب 💞😌
يسمعج كلمة حلوة ولاتاخذي شاب يجيبلج موبايل جديد تقري من شاشتة كلام حلو وتتحسرين💔
اخذي شاب 💞😌
يجيبلج الريوك. يمج الصبح ويتريك وياج ولاتاخذي شاب يتركج تتريگين لوحدج ع طاولة سفرة تكفي 12شخص .....
اخذي روحي اخذي قلب لاتاخذين فلوس وذهب 😌✋🏽

زين وين هذا الشاب وين هاي البنية