اللهم صل على محمد و ال محمد

كلمات لطمية حبيبي حسين:




يا عيني بالدمع جودي .. حبيبي الراح من إيدي ..

حبيبي حسين حبيبي حسين



ترد خالي يا مهر حسين جا وين الولي وينه

نعاين سرجك المقلوب تشب نار الحزن بينه

أطفال ويتامى صغار والحره تبارينه

وبعينك تشوف الظيم بانت كل عناوينه



يا مهر حسين جاوبنه .. نحلفك لا تعذبنه ..

تركته وين حبيبي حسين



جنت ويه أبويه حسين مثل رمش وجفن تدري

شيحمل لوعة فراقه أبويه و أغلى من عمري

يا ريت بقلبي صابوني وقبل نحره انقطع نحري

شتظن ألزم جمر بيدي و أبد ما ينخمد جمري



حفرت قبري يا هالميمون .. شتظن لوعة أبوي تهون ..

عمود الدين حبيبي حسين



رقيه آنه يالميمون علينه حرقوا خيمنه

ندور عالكفل زينب ندور عالقمر عمنه

نشوف جفوفه مقطوعه نغسله من نزف دمه

لقينا جاسم مصرع عجنه من الدمع حنه



بعد شحجي شسولف لك .. تمنيت الأجل قبلك ..

فقد بدرين حبيبي حسين



تدور عن علي الأكبر شبيه المصطفى المختار

أمه الفاجده ليلى تصب دم ودمع فجار

تشوفه مغسل بدمه قلبها يلتهب بالنار

أصيحن من أشوفنها تخمد النار بالأعبار



يا الأكبر قوم حاجيها .. تعيش بفرحه خليها ..

ولاك البين حبيبي حسين



أتعثر وأنه بممشاك أدور عن نظر عيني

أدور عن حبيب الروح أبويه وبهجة سنيني

الفكر مني يظل محتار منو لدربه يدليني

أشواك وسياط ونار تصوبني و تدميني



أجر حسره بأثر حسره .. أدور مهجة الزهره ..

أحصله وين حبيبي حسين



سمعت من العقيله تقول أبويه من القفا مذبوح

شفت جثه بليه راس صبغها دم وكلها جروح

عرفته هذا بويه حسين فداه عمري وفداه الروح

قلت له بويه هضموني ودليلي من العذاب يلوح



أشوف الشيبه مخضوبه .. أعاين جثه مسلوبه ..

فداه العين حبيبي حسين



يجاوبني نزيف الدم نزيف و أزكى من الياس

يا بنتي ما إلي حيله و صدري بالخيول إنداس

يا بنتي قومي من يمي و روحي لعمك العباس

شوفي جفوفه مقطوعه ومصيوب بعمود الراس



وقصدي يم قمر عدنان .. غدا متقطع الذرعان ..

بلا جفين حبيبي حسين



رحت يمه وشفت عينه سهام البين صابوها

يا عمي عاين الزينب العقيله الحره يسبوها

يا عمي الماي ما نريده تشوف سكينه يتموها

ما تنهض يا بوفاضل علينه خيمنه حرقوها



عقب ما سلبوا الخدر .. يا عمي ما تجي وتحضر ..

تناصر دين حبيبي حسين



وحده من الخيام تصيح يا عبدالله شقطع نحرك

وسافه من إيديه تروح قبل لا يكتمل بدرك

يدفنك والدك يا بني وبيده ينحفر قبرك

يا ريت الموت ياخذني خلص عمري قبل عمرك



على راس المنيه تحوم .. حبيبي بالسهم مفطوم ..

حفر قبرين حبيبي حسين