الحسن مظلوم

عله المسموم مهمومه الحسن مظلوم من يومه
اذكرت ابني وكثر حزني
الحسن مظلوم من يومه

انه المظلومه يا شيعه الي ابصحن الجبد نارين
تشب لجل الحسن وحده وتشب وحده لمصاب حسين
فرق ما عندي بأولادي وآنه اشعندي غير اثنين
الحسن روحي وأعز منها وحسين اغله من العين
لجن هالليله ارد اعتب اعاتب شيعتي الطيبين
عله حسين الدمع تجروه وجنكم للحسن ناسين
الحزن لحسين وايتامه الحسن ناسين آلامه
صدق ظني وكثر حزني
الحسن مظلوم من يومه

اعاتب والمحب يعتب يشيعه وحكَها روحي اتلوم
انه أبكل مأتم اوياكم نحن لمصيبة المظلوم
عله حسين الدمع واجب لون نجري عليه ادموم
مصيبه اللي جرت بالطف تخلي كل كَلب مهموم
لجن يا شيعه أخبركم الحسن هم مثله شاف اهموم
وهم اتحمل امصايب يوم اللي كَضه مسموم
الكَلب مجروح لغيابه الدمع مسفوح لمصابه
ارتفع ونّي وكثر حزنّي
الحسن مظلوم من يومه


ملامه بالنفس ظلت تريح النفس من تظهر
يشيعه أولا تظنوني ميولي للحسن اكثر
الحسن ما فرقه عن حسين بنيني وبيهم اتفاخر
مصيبة كل ابن منهم سعير ابمهجتي التسعر
لون كَلتولي عن حسين ذبيح وعالثره اموذر
الحسن هم وذروا جبده امن اذكره الحاله تتغير
الكَلب مفجوع تدروني أصيب ادموع خلّوني
النحب فني وكثر حزنّي
الحسن مظلوم من يومه


لون كَلتولي راس حسين ذبيح وبالطشت خلوه
الحسن هم بالطشت جبده تخاذف ساعة الوذ روه
أريد اوصيكم الليله وطلب يا شيعتي اتسمعوه
أريد اشما تذكروني الحسن ومصيبته اتذكروه
والأصعب واشد من هاي لون يا شيعته تنسوه
اصب اعليه دمعاتي ولا تكفيه عبراتي
يألمني وكثر حزنّي
الحسن مظلوم من يومه


يشيعه والدعت روحي ابلهيب الحزن مستعره
اذكرت ابني الحسن لمن كَضه وايتام اله اتنظره
لون كَلتولي عن حسين انذبح وعياله منذعره
وكَع بالطف واجت يمه الرباب اتقبله ابنحره
لجن ابني الحسن أصعب ابهالحاله واشد أمره
عوض ما زوجته اتواسيه ولنها زوجته اتغدره
ابن ذبحوه عدوانه وابن غدروه أعوانه
ابهضم لني وكثر حزنّي
الحسن مظلوم من يومه


بعد يا شيعه أخبركم خبر خله الكَلب ينضام
اذكرت ابني الحسن لمّن اعله نعشه حاطت الظلاّم
لون كَلتولي جبد حسين سهم صابه وترك آلام
الحسن مثله انضرب نعشه يا ميّت رموه اسهام
لون كَلتولي شاف حسين بنينه اعله التراب أجسام
الحسن هم حضر برص الطف وشاف اعله الأرض جسام
الهضم يزداد واللوعه عله الأولاد مفجوعه
اشظهر مني وكثر حزنّي
الحسن مظلوم من يومه


وبعد يا شيعه أخبركم خبر سجَّر دليلي ابنار
احن لزيارة اولادي وعليهم تطفح الأعبار
اروح اكَصد ضريح حسين اشوفه امكلَّل بأنوار
ملايين البشر تكَصد تطوف ابكَبره ليل انهار
عكس كَبر الحسن مهدوم اشوفه وما اله زوّار
واصيحن يا سبب هدموا كَبر ريحانة المختار
نهار وليل بالحسره دمعتي اتسيل يم كَبره
ابتعد عني كثر حزنّي
الحسن مظلوم من يومه