بلسان حال الام التي فقدت ولدها بعدما اصبح ضابطا في الشرطه
كي يخدم وطنه وابناء شعبه الا ان يد الارهاب طالته غتقول
ابني

ابني وياه جسمت الروح نصين .........وجنت وياه اعيش ابروح وحده
رضعته وياللبن غيرت العباس...........ونذرت الهلوطن ابني اجنده

ابني الجان مهده منبر احسين,,,,,,,,,وبدموع الحزن كنت اهز مهده
وعله مهده اعلكله الخضرمات.........يوسف ابني اخافن لا احسده

ومثل الماي بالماعون اداريه ........وماعوني انجفه ومايه تبده
وبني مادفنته وبلعته الكاع.........بجرح كلبي دفنته وصار لحده

ودمي ايطوفه وي نبض الشراين .........وناجيه ابحناني وابكي عده
ما انساه ابد وشلون انساه............ابني ويالنفس معكود عكده

تنام اعيون ليلي وانه ما انام؟......وعله حالي بكت حته المخده
ومن يوم الرحل لليوم انعاه.........وعل الخنسه حزن قلبي تعده
ولو راسي وجعني والالم زاد.........ابقميصه ايطيب راسي من اشده

بفراكه العمر مر بيه عاشور.......ويشب جمر الحزن ماريد اخمده
ونه غير الحزن ما ارجه خطار........الفرح لوجاني من الباب ارده

وذاخطار طيفه مرني بالنوم......ادعي من الله ليلي ايطول وعده
وجفوني تصير اكفوف للعين.......تحضنه بكل حنان وما تهده
واشم منه عبير ايسكن الجروح.......وتفيض اعيوني بدموع الموده
وبوسه ابلهفت العطشان للماي,,,,,,,,لحد ما ينطبع بشفافي خده

يمرني الكيض وانه ابعازت الديم,,,,,وجرف جرحي ايتفطر بيش اضمده
تمنيته يرد ابني فرد يوم .........بس المات ياكاع الترده
الفاتحه على روحه الطاهره
اخاكم
الحركاني