السلام عليكم ورحمة الله وبركاته
اللهم صلي على محمد وآل محمد
نبارك لكم ولادة سبط الرسول صلى الله عليه وآله الامام الحسن عليه السلام
راجين من الله العلي القدير قبول اعمالنا واعمالكم وقضاء حوائجنا بهذه المناسبه الكريمه.

ازداد حبها الروح واشواكي علت *** وعهد الكم نلتزم ومجددين

وعلى اوتار الكلب عزفت رددت *** وياكم احنه ومانحيد منتمين

والتلوم تلوم خلها اشما حجت *** رافضه عنه تكول وكافرين

الحجي ماينفع ولاهي الغيرت *** انولدنه ابحبهم وبي عايشين

جبل متهزه الرياح اوحركت *** قوه نزداد بعشكهم صابرين

بدمنه يجري بالكلب واسجلت *** انذوب وبحبك امير المؤمنين

لجل هذا الناس حضرت شاركت*** نست كل احزانها ومعيدين

فرحه عدنه اليوم والدنيا زهت *** بمولدك ياسبط سيد المرسلين

ياامام وحجه والناس أهتدت *** على نهجك تمشي وبي مقتدين

ايه انت واضـحه وتنزلت *** يادليل ودرب يهدي الحايرين

الصفات البيك كثــره تعددت *** مدحك يطول ونظل مكصرين

الحلم عنده وشجاعه اتجسدت *** والتواضع طبعه بيه اميزين

موعجيبه الدنيا شخصك واظلمت *** شوهت بيك الحقيقه مغيرين

وموعجيبه الناس ضدك عادتك *** الباطل بدربه مشت ومأيدين

كبلك الكرار حيدر حاربت *** وانت بيدك رايته ولا ماتلين

غصن من شجره على او خضرت *** من محمد فكرك الواضح مبين

ياشمس بيك الحقيقــه نورت *** فضحت الرادوا يحرفونه الدين

الشيعه رايتها ابيمينه اتمجدت *** لا ابـــــــد ماذلت وهذا يقين

افكارك ولحسين دربه مهدت *** بثورته الهزت عروش الظالمين

انت باب الكرم والدنيا اشهدت *** ابن حيــدر انـــت سيـد المتقين

الك نشكي اهمومنه البينه اكثرت*** ومنو غيرك نكصده ومتوجهين

كثرت الطبرات بينه واوجرت *** وانت تدري سيدي متحملين

الجروح البينه كلها اتلجمت *** والوطن مالوم مهموم وحزين

بس شعارات وحجي واصفطت ** ما تداوي اجروحنه وبينه الانين

يالحسن تنخاك والواودم دعت *** بمولدك همها تفرجه طالبين

اشنحجي شنكول وعلينه اتلملمت * والاحزاب اهواي صرنه مقسمين

كثره ملاحينها وبينه ابحرت *** السفينه اشلون ترسي امامنين

ياعراق الحسره بينه ومابرت *** وبيك طعنات الرماح مكثرين

ويه الارهاب اللي باكت فرهدت*** اذياب وبشرها اغدرت متحزمين

الرادت تكحلها تاليها عمت *** ضاعت الحسبه علينه متيهين

يا امام الجود والناس انتخت *** ماترد نه وبيك احنه المنتخين

العراق اوناسه اوبيك احتمت *** ماتخيب البيك لاذت محتمين