السلام عليكم ورحمة الله وبركاته
لقد قرات هذه القصيدة منذ زمن للشاعر سيدمحسن الشطري عاد بعد غربه الى العراق واحببت ان اضعها بين يديكم اليوم:
.
يكاظم تهت من رديت
يمكن باكوا الديره...
يكاظم للالكيت الدار..
لابستان اهلنه..ولانواعيره
ولاذاك المضيف الجان يضحك
لون من ابعيد يتمايز خطاطيره
انطفت ناره..وبعد مافاحت ادلاله
وصفه بين الجموع احجايته ازغيره
ولاذاك النخل شاخص..
يحن لو هب شمال ويحتضن طيره
ولكيت الشط شحيح
ويرتجي امن الغيث يمته اتهل تباشيره
وشفت هيمه يكاظم..تمشي بيه اشباح
ومتيه الدروب وزاده الحيره
وشفت شمعه الوطن
بس ذابت امن الغيظ
يصرخ باعله صوته..انباكت الغيره
الوطن يعتب يكاظم..مغظب وزعلان
من باعوا هله...وباكو نواطيره
** ** **
الوطن ذمه يكاظم...يستغيث اليوم
واحنه اسباع جنه ونحفظ الذمه
الوطن كثرن اجروحه
وكله تنهش بيه
واشرار الخليقه اعليه ملتمه
دكوم وايدي بيدك خل نردله الروح
ونضمد اجروحه..ونجلي الهمه
اووحكك ابد مامندوم
زلمه اليغسل اتراب الوطن دمه
دكوم امطشر اعراقك
يكاظم...ياهو اليلمه...