زوجي الغالي..ياحبيبي ليتنـــي ماكنت أحبــــــــــك !! قصة طلاقي من حبيبي...((م هـ م )</STRONG>

موضوع لأحدى الاخوات

أنا من مدة أفكر أكتب هالكلام وكنت متردده بقولكم عن قصة طلاقي من زوجي حبيبي...
والله على مااقول شهيد... هــــــــــــدفي
من هالطرح ليس الشكوى فالشكوى لغير الله مذلة هدفي رسالة لكل زوجة تشتكي من حياتها من زوجها حبيبها...
أصحي لاتهدمين حياتك وأعلمي ان زوجك الغالي له مكانه بحياتك يمكن انتي نفسك مو عارفتها وتبين لو لاسمح الله فقدتيه...

أنا تزوجت قريبي وهو يحبني حب بجنون و كان يقولي : ( أنتي أمنية بحياتي وتحققت)
تم عقد قراني وانا بال 17 وتزوجت 18 عشنا فترة ملكة تقريبا 11شهر وكانت أحلى 11 شهر بحياتي كلها
ماانسى لما نجحت بنسبة حلوة وبشرته كيف فرح واهداني هديه غاليه بس مو أغلى منه...

حلمٍ جمعني فيك .. ما كان بالحيل
حلمٍ ولكن .. شوفتي لك قليله
ناديت لك لين إسمعتني المواصيل
واشتقت لك .. كن العمر صار ليله
ولمستك بروحي .. وكانت قناديل
أصابعي .. والقلب نار.. وفتيله

ياما طلعنا وتعشينا مع بعض وتكلمنا بالتلفون 4 و 5 ساعات متواصله بدون كلل ولا ملل وكنت دايم انتظر مكالماته بشوق ولهفه

أتحرى من زماني ساعتين : ساعة شوفته وساعة جيته ... و احترق في كل ساعه مرتين : خوفي ينسى أو تطول غيبته .. و بس يقبل تعتريني رجفتين : رجفة الفرحه و رجفة هيبته .. مات قلبي يالخلايق موتتين : يوم شفته ويوم روحي حبته
**************
كان يحبني حب جنوني حب يفرحني وبنفس الوقت يخوفني لأنه هو أول رجل بحياتي بعد (ابوي الله يطولي بعمره) و كان دخوله بحياتي قوي غير الدنيا بعيني وحسسني بلأمان بس والله رغم أني فرحانه فيه كنت دايـــــم خايفه وعلى أعصابي خايفه من السعاده اللي أنا فيها وخايفه (أفـقـــده) وخوفي كان بدون مبرر لكن احساس الخوف بفقده كان معاي دايم...

ليتي معك دايم .. روحي فـ هواك هايم
واخفيك مع روحي .. آمالي وجروحي
وانت السهر والليل .. وانت القمر وسهيل
وانت سبب نوحي ..

كان يسهر معاي في بيتنا أيام الملكة ولايروح الا لما يرجعون أهلي وكان يستحي لما يشوفهم وراحت الايام بسرعه وقرب العرس وكنت ( أميــــــــرة ) يوم عرسي كل الناس يتكلمون عني وعن شكلي بالعرس...
حتى بالصالون كل البنات كان واقفين حولي وانا مااعرفهم مع ان كان في عروس غيري بس كلهم كانوا يسألوني ويسولفون معاي ويقولون لي شكلك روعه...
بس انا مافرحت الا لما رحنا الفندق انا وزوجي و مدحني و قالي : (شهالزين ) بس هو اللي المدح منه فرحني...
ومرت اربع ليالي بالفندق من ألف ليله وليله...ماحسينا فيها لدرجة أن احنا ماطلعنا من السويت...علمني فيها كيف ممكن شخص يحبني أكثر مما أحب نفسي...

انتظرتك .. عمري كله .. وانتي حلم
ومرت الايام والله .. وانتي حلم..
انتظرتك عمري كله .. وانتي حلم ..
كل نجمه شعشعت والقلب عتمه .. كانت انتي ..
كل حرفٍ حرك شفاهي بكلمه .. عنك انتي

و رحنا لعش الزوجية وشفت فيه انسان ثاني مااعرفه ما مر على نبرة صوته غير ...ملامح وجهه غير...يصرخ علي بدون سبب والله بدون سبب ...ياناس صدقوني واللــــــــــــــه انا مع انسان غريب عني وين زوجي ؟!! وين حبيبي اللي اعرفه؟!!
وين الحب؟؟ هذا هو الزواج !!! هذا اللي البنات ذابحين نفسهم عليه؟!! ياناس انا مجنونة من بيصدقني زوجي اول ليله لي في بيته يقولي لمي أغراضك بطلع وبرجع ماالقالك غرض بالبيت ...
ياربي...من بيصدقني؟؟؟
زوجي شفيه...معقوله عشان ماكان قادر عالجماع ؟
يحملني ذنب مهو ذنبي ؟ هو مايقدر أنا شذنبي ؟
قلت يمكن هالشئ طعنه برجولته لازم أوقف معاه ولا احاسبه على أغلطاه أكيد هو مايقصد أكيد بتحسف...
مرت الأيام ثقيله تمنيت إجازة العرس تمر بسرعه وارجع الجامعه...كنت عايشه بدوامه ليش هل انا بحلم ولا بعلم هذا يحصل معاي ومن من؟ من أقرب شخص...
الأيام تمر وكانها سنوات ثقيله مملة قضيتها لحالي او مع اهله عروس بلأسم بالحقيقه ( أرمله )
اليالي تمر علي دهر بااااااااارده ممله كئيبة كنت مثل الطفل بيني وبين نفسي أصـــــــرخ ( أبي أرجع لأمي ) ( أبي أطلع من هالعذاب ابي بيتنا) بأي ثمن وبأي طريقة طلعوني من هذي الدنيا هذا مو مكاني ابرجع طفله عند أهلي ولا ابي الزواج ..
كان ودي أشكي لأمي بس كانت فرحانه بعرسي ماااقدر أعذبها أمي فرحانه فيني تسولف لصديقاتها عني ...تقول دلعوتي عند زوجها تغيب عني بلأيام صار زوجها أغلى مني بس أنا ماابي الا انها تكون سعيده...مسكينة ماتدري أني أهرب منها أتعذر عشان مااجيها وتشوف بعيوني العذاب اللي أشوفه...
مااقدر اتكلم زوجي غريب يصرخ علي بدون سبب لو قلت هالشئ لأي أحد لو أمي بتقول كذابه مافي شئ بدون سبب انا نفسي مو مقتنعه شلون أشكي...؟
مرت الشهور وانا احبه ولاابي الطلاق بس زوجي حبيبي معذبني ولا لي ذنب في اي شئ...
وظهرت مفاجاءة جديده و صدمه ضميتها للصدمات اللي قبلها زوجي مسحور...واهله عارفين كل اللي أنا كنت أعاني عشان أخفيه واللي ساحرته وحدة من اهله لان بنتها تحبه وتعشقه...وعرضت بنتها عليه ورفض وتزوجني...

لكل قصة حب .. عذال وحسود ..
ليه تخدعنا الأماني .. والليالي السود .. سود
إشعلي جمر العناد .. قربـي معاد أشوفك ..
لا يفرقنا السواد ..
ارسمي وجهي بكفوفك ..

مرت 10 شهور من الزواج قضيت معظمها فبيت أهلي ولاانكر انه لما كان يذهب للرقية كان يرجعلي زوجي وحبيبي القديم نفسه بصوته بضحكته كان يتغزل فيني مثل اول وكان يرجع يقولي (عيونك أحلى عيون شافتها عيوني ) وكنت أقوله: ( صح لسانك ) لاني احس لما يقولها كانه يقول شعر ونضحك...وقدر انه يجامعني بعد مرور شهرين ولكن ماكتب الله لي الحمل (الحمدالله على كل حال) وكنا كل فترة تمر علينا أيام من العمر وليالي ماننساها...
جاء زوجي الغالي حبيبي اللي تحملت العذاب عشانه وصبرت عالبعد و رضيت بأن كل فترة نكون أغراب كل من في بيت أهله
قال لي حبيبي : ( حبيبتي...أنت الدنيا اللي عشت عمري كله عشان أعيشها والحمدالله الله كتبلي أتهنى بقربك ...بس انا مو راضي اكون سبب عذابك...وانا عاجز اني اسعدك نفس غيرك من البنات لازم ننفصل) بكيت...ترجيت...حلفت أني راضيه أكون معاه على اي حال و بأصعب الظروف متنازلة عن السعاده متنازلة عن الحب عن كل شئ بس أبي أكون معاه..او علأقل اقنعني كيف تحبني هالحب وترضى تتركني!!!

لو تغيبـي ولو رحـل وجهك حبيبـي
في غيابـي عنك أشوفك .. وفي عذابـي منك أشوفك
صـدقينـي مـا نـقـص هالليـل بعدك إلا قمـرا
واجمل الناس حبيبـي ..
أنا أحبك ذا نصيبـي .. إبعدي عني وغيبـي
صـدقينـي مـانـقـص هالليـل بعدك إلا قمـرا

قال : (بس انا مو راضي لازم كل منا يشوف حياته..)
زوجي الغالي حكم على قصتنا انها تنتهي وقال لي كـــافي... هذا نصيبنا!!!)
الله يسامحك ياحبيبي... لو تعرف الليالي اللي جتني بعدك كيف مرت على ماحكمت علي بهالحكم...

لو هجرت الود وزهور الأماني *** وارتضيت البعد عن قلبي وبيته
لك تراني مخلص بكل المعاني *** واستحاله ماضي الفرحة نسيته

عرفت اني رميت من عمري 10 شهور في النار وجنيت ذكرى كفيله انها تعذبني 10 سنوات قدام...

آه. .يا لجراح .. راح اللي راح ..
وراحتي .. من يا ترى بيردها ..
يا حب.. ياذ كرى واسم..
مدري انا ابكي عليك من العذاب اوابتسم..
صدقني في يأسي .. نفسي تبي نفسي تبيك ..
لا يا دفا شمسي تبيك..
ليه خنتني ..الله عليك
والحين اللي بينا يعذبني والعذاب الاكبر اني ممكن اشوفه لان احنا اهل ...ليته علمني كيف انساه واكرهه قبل لايروح...

علمني وشلون أنساك وأنام *** وانا اللي لك صاحي أيام وأيام
شاغلني في حالي طيفك ولايروح *** صاحي انا ونايم مايروح مايروح...

ورحت للمرة الاخيرة للمكان اللي جمعنا المكان اللي بكينا فيه وضحكنا و شكينا وفضفضنا فيه لبعض واللي ركضنا ولعبنا فيه بس المشكلة ماقد تزاعلنا فيه ولا عمري زعلته مني بشئ وهذا الشئ معذبني ومعذبه...كنت اشوف غرفتي واتأملها عشان مأنسى المكان اللي كان يجمعنا كل ليله...وهو ينتظر بالصاله ينتظرني ألم أغراضي وأرحل من بيته وحياته..

مما بروحي لا أزعج الصوت وادعيه
غديه يسمع صيحتي من عذابه
اللي هجرني ما درى ويش أنا فيه
أقفا وقفي ما يرد الإِجابه
لولا الحيا .. ثوبي من الغبن لا أفريه
وأجدع هدومٍ .. ما وقتني حرابه
وأبكي وأبكي من شكى ظلم غاليه
واللي فقد شوف الأهل .. والقرابه
وأصفق بكفٍ وأتبع الصبر باقيه
وأقول تكفى .. وآصله حد بابه
وأجعل ظلام الياس نور الرجا فيه


_( إنـــــــا لله وإنا اليه راجعون اللهم أجرني في مصيبتي واخلف لي خيراً منها)_

تذكرتك .. وأبي النسيان ألايا خل ساعدني
أنا مالي ورى الذكرى .. إلى مات الأمل خيره
أنا ودي على الفرقا حبيبي لو تعاهدني
وإلى شفتك .. تصد ولاتجيب لما مضى سيره
تخيّر غير هذي الأرض .. مكانٍ به تواعدني
تخيّر لك مكانٍ صعب .. أعرف فيوم تقديره
عسى الجرح الذي يدينك أشوفه عنك يبعدني
أنا اللي أكرهك .. وأحبك .. شعورٍ صعب تفسيره
حسيبك .. يالهوى الظالم .. حسيبك لاتعاندني
بيلقى صاحبي غيري وأباالقى في العرب غيره