تويت
- زرارير البراري -
رابط القصيدة بصوت الشاعرhttp://www.hussamaliraq.com/sh3er%20sha3be/mthafr%20alnwab/zrazer%20albrare.rm
- زرازير البراري -
حن ....
وآنه حن
وأنحبس ونه....
ونمتحن
مرخوص بس كة الدمع
شرط الدمع
حدة الجفن
****
جفنك جنح فراشة غض
وحجارة جفني وما غمض
يلتمشي بيه
ويه نبض
روحي على روحك تنسحن
حن بويه حن
****
عيونك
زرازير البراري
بكل نشاط جناحها
بعالي السحر
والروح مني
عوسجة بسر
ما وصل ليه النده
ولا جاسها بكطرة المطر
وصفولي عنك بالنباعي تفيض
وتعنيت ليله ...ويه الكمر
وصفولي عنك كل مسامة تفيض
منك عطر...يلحسنك نهر
تنزل بصدري ويه النفس وبدمي
غصبن تنعجن
وأشهكك وأصعدك للسمة
بحسرات وبعنة حزن
حن ...بويه حن
****
شفافك ولا كولن ورد...
عنابه معكوده عكد
تمتلي بكد ما تنمرد
لاهو دفو لاهو برد
آنه بوصفه راح أجن
****
سكتاتك تشكل خواطر بالكلب...
مالي عرف بيهن كبل
مبروم بره الريزه
ياريان ومخوصرخصر
لف العكل
كل جلمة منك....
نبعة ريحان...بالدلال...
ما تحمل ثكل
وصفولي عنك
وردة القداح ريش جناح
زاهي بالسحر
وصفولي عنك
شال منك غيظ بستان الورد
والنرجس الرايج سكر
حني بفوازير ولحن...
حنة حمامات السجن
حنه إلي...
وجنه إلك...
واللي يعجبه خل يحن
حن بويه حن
****
آنه من أشوفك
يمتلي الماضي الجدب
زهرات بيض من الوفه
وروحي سواجي من الحنين تصير
وأتنبه وكت بيه غفه
يا محجل إن مريت بيه ردود
أرد أردود للعشرين...
من عمر الجفه
وأنصف عمر منك
نصفته بالهجر...
والهجر منك ما كفه
حتى الهجر يا روحي
منك ما كفه
وكلبي أعله هجرك كام أيحن
حن... بويه حن
****
حن ...
وآنه حن
وأنحبس ونه....
ونمتحن
مجبور أرخصك على الدمع
شرط الدمع يجوي الجفن
- مظفر النواب -