بمناسبة الذكره السنويه الثامنه لاستشهاد المولى المقدس محمد الصدر رض

انشر هذه القصيده بهذه المناسبه المؤلمه على قلوب شيعة ال محمد







اضل طول العمر متندم عليك

واعض روحي ندم موبس اصابع

ياثمرة حصاد المرجعيات

ولا من شتلتك تلكه المزارع

خضرت بوكت كل احنه ميتين

عجيبه وبس الك نصغي المسامع

ومثل عيسى الك صارت كرامات

ياميت تكلمه انحسبه راجع

صلبوك بمدافع بس يخافون

ماشايف مدافع بالمواضع

وانته تغير بيهم اعزل الايد

بحافر عصتك دست المدافع

عدوانك واخوتك دارت عليك

تدافع منهم وعنهعم تدافع
اجيت بمعجزه مثل النبيين

وشفنه المعجزات وكلنه جذاب

اذا يونس طلع من بلعته الحوت

ياما طلعت من حلك الذياب

واذا ابراهيم بردا صارت النار

انته النار بيك وتلبس ثياب

بس ماتحترك نارك عله الدين

وكلما تحترك تركض لبو تراب

صحيح اهل العلم عدهم مقامات

وناتج كل مقام العدة اسباب

بس انته بسط فوك المقامات

وكل ساعه النظام يحسبك حساب

غاب من الشريعه الكمر عباس

وهسه من الشريعه الصدرهم غاب

ولان صوتك عدل ولحق تدنيه

مثل جدك علي ماعندك اصحاب

داحي الباب ويكلك علي وياك

لان شافك دحيت من الوطن باب

عليك وما نشف دمع الملايين

يالحمة مروّه العضة الناب

شيعناك امس بس ما دفناك

لان نعشك كسر كلب اليدفنون

صافن عالنعش من شالته الناس

ونعشك عالمتن بيد اليشيعون

وكلهم لا غلط حطوه عله الكاع

وانتم فوك جثمانه تصعدون

لان ادري المتن شايلته الصدور

اشلون انته صدر وتشيله المتون

شراره من الطفوف اوّرثت بيك

وتشب نيران كبره شما يطفون

انته اول صدر بي لاذت الناس

وكبل جان الظهر يحمي اليلوذون

يخيّال المهر من غير خيال

وخياله اشكثر ضلو يعثرون

ما داخل حرب ماشايل سلاح

بس اهل الحرب منك يخافون

تغير بعصتك فوك المنصّات

ومن حلكك ضحايه اشكد يطيحون

تقاتل بالفكر بس جنك بسيف

وتسل سيف الكتاب شما يسلون

صح اعمامتك وصله من القماش

بس تنكلب خوذه بساعة الكون

ندري بعابس اجنن بالحسين

ولهسه الناس باسمه تصيح مجنون

وتكطع وصل بالغاضريّات

لان هذا طبع كل اليحبون

واشكن مثل عابس حبك حسين

وماشالك جسم شالك بالعيون

واذا مومثل عابس انه غلطان

اذا مو مثل عابس جا مثل جون






حازم السهلاني