[ايصح سطر بكتاب يغني عن كتاب
او منه تاخذ حكمه ودروس او عبر
او حاشى بعض الناس تلگاله مثيل
او بيها بس بالأسم تتسمّه بشر
الشلب بالطين ، بس خيره يفيض
او شجرة الصفصاف طول .. ابلا ثمر
شوف ، چم سيف الطلب نحر الحسين
انطيني واحد ، بعده خلفله اثر
او لاتگلي النصر يرجع للسلاح
حسين بالطف دمه عالسيف انتصر
* * *
الآن تنعاد المواقف والوجوه
او نفس ذيچ الواقعه او نفس الصور
او صوت باطل طغه في طف كربلاء
ايرن صداه للآن ويفت الصخر
احنه قاتلناك بغضا بأبيك
او من الف عام البغض تارك اثر
والذيول الساندت ابن زياد
اجت هسه احفادها اتحوش الثمر
مطره تحيي الگاع لو ماتت سنين
والضميره ايموت مايحييه نهر
ابكربلا جيشين قله اويه اليقين
او كثره وي الباطل او خطوته شر
قبله صارت كربلا ابفضل الحسين
وآل اميه بيوتهم مغنى او وتر
يالتكول حسين ذكرى او هم تزول
مر كلامي اوياك والسكته امر
حسين دمنه ، حسين نبظات الكلوب
العين شمعه او طافيه او هو النظر
اسمه للمظلوم عون او للضعيف
او سيف عالباطل اشما ذكره حضر
شوف جم سيف الطلب نحر الحسين
انطيني واحد بعده خلفله اثر
او لاتگلي النصر يرجع للسلاح
حسين بالطف دمه عل السيف انتصر
اللهم صل على محمد وآل محمد