النبي محمد صلى الله عليه وعلى اله وسلم


كظيم الهم واصيحن اه واراه
اصل بيت النبي بياعين واراه
اناشد ياهو وسط اللحد واراه
كالو حضر بس حيدر وصيه



اشسبب اعتب على العذل ولامه
واطش العتب بدروبه ولامه
نبي وللامه وصاها والامه
تخونه وتخلف حكوك المنيه

************************************************** ******


الامام علي عليه السلام



المحن بادت عشرتنه وهنه
ومصاب المرتضى حيدر وهنه
طبر راسين ابن ملجم وهنه
راس المصطفى وحيدر وصيه



الصبر سنه يبو الحمله نسانه
وهيهات الجزع سيفه نسانه
يبويه ما اظن شخصك نسانه
يتامه والاهل بالطف رميه



************************************************** ******************************



السيدة فاطمة الزهراء(ع)



ابوسط بيت الحزن عليك ضلعاي
ودليلي من الحزن والنوح ضلعاي
عكب عينك يبويه انصاب ضلعاي
ولهيب الدار جمراته سريه




ونين الدوح لكتابي يفضه
وحنين الكلب ما واحد يفضه
على الصاحت الحكيلي يفضه
وكع محسن يويلي اعله الوطيه


************************************************** *********************


الامام الحسن الزكي (ع)


الحسن انه وجروحي اجروح وديت
دمه وجم خبر لهل الشيم وديت
بكبر جدي الرسول اندفن وديت
لجن ام الجمل منعت عليه




جريح وبعد ما تضمد يروحاي
على المات واهل كومه يروحاي
الصبر شح منج ومني يروحاي
يحك اعله الحسن ننحب سويه


************************************************** *********************


ابا عبد الله الحسين (ع)



وحك عودك امام الانس و جن
نشدت الرايحات عليك وجن
صحت يحسين هاي الخيم وجن
وين اليخمد النيران اليه




الكدر مسرع اويايه ابهضم ما ان
ومثل ونات كلبي كلب ما ان
يشيعه اشما شربتم عذب ما ان
اذكروني ابمصاب الغاضريه


************************************************** ********************************************


الامام علي السجاد



عكب ما جانت ايامي سريه
جفتني وخذت من داري سريه
اعله كومي الما بكت منهم سريه
تظل نيران دلالي سريه



ابدليلي اصواب ما يندمل ويصيح
ولا يصفه الوكت وياي ويصيح
جني بالعليل ينوح ويصيح
انهدم بيتي بمصاب الغاضريه

************************************************** ********************************

الامام محمد بن علي الباقر


يمن شرعت ركن الحق وسافه
عليك الهم رفع رمحه وسافه
ولاك الخصم يالباقر وسافه
وهدم كبرك يسر الله ونبيه



يبو الصادق يمن نهجك حيانه
يون كلبي ويظل عكبك حي انه
تموت انته وسف ابكه حي انه
عسه كبلك خذت روحي المنيه


************************************************** ***************************



الامام جعفر بن محمد الصادق



المحب من جفنه هد سيله وهدماه
الدمع بلل صحن خده وهدماه
عسه كلمن سعه ابكبرك وهدماه
ابشلل لا للحيا ولا للمنيه




الحزن ذبل هرش كلبي وفاته
وجزاه الوكت بالمحنه وفاته
الامام الصادق اليله وفاته
نواسي ابغيبته الهادي ووصيه

************************************************** ***************************


الامام موسى بن جعفر الكاظم



اباسم باب الحوائج حين سموك
ابوسام الشرف اهل الشرف سموك
وسف كوم الغدر بالسجن سموك
وبكه فوك الجسر نعشك رميه



بني العباس ما عمرت وغه لهم
امن اميه استارثوا غشهم وغلهم
ابنفس هذي سلاسلهم وغلهم
انجتف جدك علي امن الغاضريه

************************************************** ****************************

الامام علي بن موسى الرضا



زمانك يالرضا باهات عمك
وصبح عام الحزن والنوح عمك
رحت مسموم مثل الحسن عمك
وغربتك من غريب الغاضريه



سماتك ظلت اويانه وثارك
ومصاب اهلك هضم حالك وثارك
ابحكك ياخذ المهدي وثارك
ويحسبه ابثار ضلع امه الزجيه

************************************************** *************************


الامام محمد بن علي الجواد



اريدك غيرك امن الناس مارد
الزمان اعليك اصبح شبح مارد
يمن سم الغدر لحشاك مارد
بدالك ريت وافتني المنيه



يمن لا بر مثل برك ولا جد
مثل جودك فلا الكه ولا جد
وبعد لا ام مثل امك ولا جد
مثل جدك يبن تاج الرعيه


************************************************** ***********************


الامام علي بن محمد الهادي


ابوسام الفخر بارينه وسمك
علي ووارث علي ابعلمك وسمك
لمصابك ناحت الزهرة وسمك
فطر جبد النبي وحيدر وصيه


كهف بيك احتمت روحي ولا ذات
شهد ذجرك صبح الها ولا ذات
لا روح المثل روحك ولا ذات
مثل ذاتك يبن خير البريه


************************************************** ***********


الامام الحسن بن علي العسكري



اون يالعسكري لبلواك وابجي ل مصابك ماهو بالمقدار وبكل
هدم كبرك خبيث الذات وبكل كلب مرقد الك يبن الزجيه




المحب ما يوم الك بالحزن هملان
حتى الصخر من بلواك هم لان
يبو المهدي عليك الدمع هملان
مثل ما تهمل اعيون الثريه




************************************************** ************


الامام محمد بن الحسن صاحب العصر و الزمان(عجل)



انشعل فكري لزم ايه هدايه
وعرفتك للبشر نورك هداية
لونك ردت من عندي هدايه
اخذ روحي يبو صالح هديه




ادور اليحن لفراكك وياحين
وكل الحنه ضلوع الهم وياحين
تظهر يا يوم يا ساعة وياحين
طالت غيبتك يبن الزجيه



************************************************** *



ابا الفضل العباس



راح الهنه وبيتي انكشع وراي
راح وكمت اصك الوجه وراح
صحت عباس اخويه اليوم وراح
اريده ايشوف دهري اشعمل بيه




لعد صوب الشريعه ابليل هاميت
لبن عودي وعلية الجدل هاميت
عدل ويكول لاجن حيف هاميت
لكيته ويمه اجفوفه رميه





اللهم صل على محمد وال محمد