تويت
الى كل منصف وغيور على دينه ومذهبه اقرا واحكم في ماجاء في هذه القصيدة المؤطرة باطر من التجاوز على الثوابت الدينيه ومس حرمة الفقه الامامي
الرساله العمليه للشاعر نوفل الصافي
الرساله العمليه للشاعر نوفل الصافي
الكره يبطل وضوء
والتبات ابحضنه غيـبه يغتسل باقرب نهر
للشوگ دافي ـ على الأحوط ـ مرّت ابجرفه حبيبه
ولو سمعها- وإن سهوا –
يشطف اذنه نص نهار ابنده تغريد البلابل!!
اليمس خد الورد كفارته يزرع حديقه
واليصافح چف جراده... امنين ماچان
انتماءه وانتماءات الجراده فهو باطل..
ديّه يدفع للسنابل .. حرگ گونية مناجل!!
البيوت الخالية من طير للحب ما تصح بيها صلاه
اليطوف الناس باحرام المحبه
حجته مقبوله ولا يحتاج للكعبه وصول
اليصلي وقبلته ارموش الفقير..
وما إجه ابّاله اشحچه اشگال الأمير
اشلون ما رايد يكبـّر خل يكبـّر
آنه اضمنله ابتسامه من الرسول
الدعاء ابلا شعر للناس.. للحب
للأمل.. ما مستجاب.
ولو إجه فرض القصيده ما تصح
تـُكتب قضه.
لوحة المليانه حب .. تبقه
..وتموت لوحة المرسومه لون امچفنه
اعله الحايط بتابوت خشباته شعار
واليعض شفته ابوجه باب الشتيمه
إنتصار.
ريحة البارود محظوره بتاتا
واليلامس سيف يكفلّه يتيم
الشبابيچ التجيلك منها ريح
إرسم اعله اخدودها بوسة اشراع
وابحر اشما مدلك الله ابروجه بجناح الضوه
لاصلاه للخوف بمتون الرسالة
ركعة الرجفه حرام
ليش خايف؟
القصور العاليه خدرانه حيل
والحچي بس للصرايف
واللسان موفقط للضوگ..
والله موفقط لبوس خالقها الشفايف..
ليش خايف؟
اللسان الينگص ايخضر اهلال
يركض اعله الباچر ابحلم الامس
ويجي باچر ويجي شاعر
يكتب الجملة الكتبناها أمس!!!
الچان باچر يوم چنه اول أمس
وهاي هيه ..
الغيمة غيمة اشما يدثرها الظلام
اتطيح من تضحك شمس
النجمه من تموت لاتلبس عليها الدمع الاسود
الگمره تحبل كل شهر تنطيك نجمه
إرسم الطيف اليعجبك
وافتح اعيونك اتشوفه..
وابصم ابخد السمه اللون التريده
وللأمانه..
الگاع حره.. فشله تتخطط سجن!!
وللأمانة..
الدين حل المشكله.. عيب يصبح
مشكله وتبچي اعله حل
الله خير اچفوفه مليانه فراشات وسلام
المحبه اقرب طريق الباب حنية الإله
الزكاه واجب عله كل المشاعر
ابلايه حب .. تكفض اجفون البراءه
تنطفي الدنيه ويخوط الليل چايه بالصبح
تنچفي الذلـّه عله خدود الملح جربة دمع.
ابلايه شوگ ..
تنشف اللهفه ويفرخ ابليس بعيون الشمع
النخله أم
شجرة التفاح أم
ونومة العاشگ عبادة شرط
ماناسيله موعد
الگلوب الليلو اكلادة عرش
ما يطب الجنه من يرعب فراشه
آثم اليصنع مخده نوم من ريش الحمام
الشهور الحرم عشره الباقي عيد..
أحمر الشفه غروب يفتح الليل
اعله موسيقى الجمال
والتيمم جائز ابكحلة عراقيه اصيله
العراقية الأصيله
الشدّت ايزار الحصار
وطبخت ابجدر الصبر لمن سجد..
يمها كلشي ابّالك ايصبّح حلال
العراقي ..الينحني ابنيّة وقوف ايعبـّرالجيل الوراه !!
الخط الأحمر يبدي من باب الطفوله
من ابتسامة طفل مثلومه
عله اضفاف الشفايف
تاكل ابلبّة لهاته
شوغة اخرس ترفس ابگلبه قصيده
حوبة البلبل چبيره
اتعثر الشط ّ و ثلث ترباع
من بحر التلوحه
الخط الاخضر يبدي من باب الطفولة ..
ابطور "داخل"
والدللوش الحنينه ابصوت فيروز
اليذكرني ابوطن منهوبه ترچية فراته
طور داخل حرز عن غول المكابر
والـ (بنفسج) تنقره حين الولاده
اتگطـّر ابإذن الرضيع
ويّه كل فرة اگماط اتلولي فيروز
ابدللوش امهاته
الخط الاحمر يبدي من باب الطفولة
وينتهي ابخيط البريسم
خيط البريسم مقدس ..
شيلة الأم علم والـ (چِــلاّب) راية
والشبگ تنور أم حته ـ لو باقي أثر ـ
يعتبر طالب لجوء
واترك لكم وللمنصفين الحكم لنه يتلاعب بالالفاظ الشرعية ويستهزئ بالثوابت الدينيه فاين اهل الحميه عنه وعن شعره الماجن
ملاحظة ارجو الانتباه جيدا لهذه الالفاظ ومحاكمته عليها
واسمي عمر امام 
فهل عندك مانع ؟
تعليق