تويت
((اعتراف خجول في حضرة الطاهرة البتول ))
من يوم السقيفة الحزن هذا اليوم
يومية فدك منه يغصبونه
واحنه مخدرين وجن صنم مطروح
لو مية فدك لا ما يهمونه
ملعونين ندري ابنومة النيام
ومخدتنه ؟؟ نعم ويانه ملعونه
لان فرعون منه واحنه فرعناه
ديرتنه نهبهه..انصيح مامونه
حصتنه دمار ومذبحة وتهجير
وعلى كل بيت سمهم هل يوزعونه
نسجد للعجل والسامري المسموع
وعديم الطعم حقنه ومختفي لونه
اليرفض هالظلم خارج عن الاسلام
تنوره انشعل لازم يحركونه
والينعت الظالم بالظلم والجور
راسه من الجسد حتماً يفصلونه
اسرائيلي عدنه اليرفض الطاغوت
واليلعن هبل والله يذبحونه
القياسات اصبحت معكوسة يا زهراء
الباطل منتشر والحك ينكرونه
ارهاب ابّلادي بأسم هذا الدين
وحتى الدين اذا عارض يعدمونه
علمونه بفتاويهم نطخ الهام
وهام المايطخ لازم يكصونه
تخدرنه بفتاوي من رجال الطين
وعلى ضبط النفس والحس يوصونه
حاكمكم موالي عادل ومهيوب
نكفركم اذا انتم ترفضونه
لذلك خدرونه وابرة التخدير
بخبث اهل العمايم هيه معجونه
ما نعتب ابد عللي يبوك البيت
بس كل العتب عالشاف بعيونه
ونعم كل العتب عالقبل بالظلاّم
وعلى الباطل عرف بيهم يقودونه
سكتنه واحنه ندري باليبوك منين
واليذبح نعرفه واليأيدونه
سكتنه والسكوت البينه صمت كبور
لو انتي وفدك لا ما تحركونه
سكتنه ونعتذر للحاكم المهيوب
لان نحجي بأسمنه من يسألونه
سكتنه ونعتذر مولاتي يا زهراء
لان حقج تصادر واحنه النخونه
وانت انتي بفدك طالبتي الظلموج
لون بهل الوكت جا صحنه مجنونه
الشاعر المبدع
الأستاذ سالم حريز الغريباوي الحياوي